تفريغ كلام فارغ 3

" مقدمة غير متقدمة على المعني الاساسي "
خلاص بعترف ان دي مرحلة التفريغ 
دلوقتي حالا بقول لنفسي هاتكتب ايه
هاتتكلم عن ايه 
وايه هي الحاجات الثابتة اللي ممكن تتكلم عنها بوضوح تام 
فين الاكيد المطلق هنا غير الكتابة في الوقت ده  واسترسال المعاني 
واخطلات الواقع بالخيال في نص " مليان تساؤلات والغاز "
شوفت ناس كتير بتقراء اشاعري بسرعة جدا 
وممكن كمان يكون ده بيحصل في التدوينات 
وكأن المعني بسيط 
وكأني عبيط 
..............................................................
اتنذفت كتيرررررررر من روحي للفراغ 
مش ندمان طبعا ولكني نذفت 
خدت بالي اني سالت شوية ناس الايام اللي فاتت
سؤال بيبداء  بجملة " هو انت كنت عارف او هو انتي كنتي عارفة "
مع قليل من الخبرة .. والاحساس بروائح الروح 
بحس الاجابة قد ايه بسيطة خالص 
تشبة في مضمونها الجمله اللي قولتها فوق 
سرعة المشهد في عيني انا 
صحيح مابقتش بحس زي الاول الاحداث 
بص انا بعدي .. بس بركز في نفس الوقت 
يعني بسيب المشهد يحصل علشان الريموت عطلان 
مجنون .. طب ما انا عارف 
ضحكتي حلوة ... ارجوك خليها في وشي 
عصبي ومتهور ... سمعني مزيكا او احضني على غفلة 
احا سهل اهو انا بكتب حالا 
" هامش "
( النحاس بيفصلني عن الحاله بس بصراحة ده مطلوب حالا 
وبالشكل العبثي ده )
شوية حاجات من دولاب الذكريات :
عن الحب وعن مواقف مفرحة " كده انا اتكلمت "
وعن الكوخ .. وحشني جدا .. بحبك وكل اللي دخلك حبك 
فيك من روحي ولا انا اللي فيا منك 
ماقولنا في الاول مافيش حاجة اسمها ثابت 
بس تصدق بقي في حاجه اسمها ثابت 
الشعور بالشيى ذاتة
فاكر كويس جدا اول بنت بوستها 
وفاكر كمان حضن امي كويس 
وفاكر كمان شكل الناس في الميدان 
وفاكر ابويا وهو بيقولي انا خلفت راجل 
الله عليك يا شيكو وانت جميل 
يامة قولت عن الوجع والقرف والزهق والمر 
واكتشفت بالصدفة اني لو شلت من مصر حرف ال ص 
هاتبقى مر 
" امسكني لاطير يابن الافاعي "
لا انا اصلا مش باتمسك 
صحيح انا اديت لعمتي ورادة بيضة على غفلة 
شوفت في وشها سعادة ماشوفتهاش قبل كده 
" طيب هاقول تفاصيل "

الواد مدحت شاكر اللي هو " الاسطى زلطة "
جالي بدون سابق تنبيه  يعني على غفلة 
بس رفع في شي اول ما دخل الورد 
دخلتة 
وقعدنا " مش مهم هنا التفاصيل "
وبعدين مشي وانا قولت الورد ده لازم حد ياخدة غيري 
المهم خدت واردة وقولت دي بتاعت عمتي 
مش عارف ليه واشمعني بس هي جات كده 
طلعت فعلا عندها وديتلها الوردة 
ورد بيضة خالص 
وابتسمت جدا وانا باتسمت 
اظن حلو اوي اني انهي الحدوتة كده ... ابتسمت :)

http://www.youtube.com/watch?v=USIOo7kbEsA&feature=related

نص مفقود

يوم اخر تحت تاثير الاندفاع اللي المجهول 
صحيت وصدري رافض تماما الهدوء 
حكة بشكل مستمر 
برغم احساسي بالصداع بسبب الكحة 
" لم يكمل  الكاتب النص لاسباب غير معروفة حاليا  "

تفريع كلام فارغ 2

يمكن يكون الاعتياد على اللخبطة هو السر
او ممكن يكون انفلات امني داخلي 
مش بعرف احدد كويس المشاعر الايام دي 
بس قررت اسامح الناس كلها بدون استثناء 
يا كل البشر مسامح 
او بمعني ادق مابقتش بزعل زي زمان بطلت ازعل 
علشان زي ماقولت يمكن يكون اعتياد  
بقالي فترة محترمة كده بدور على المجهول ذاتة 
بنبهر في المطلق من اي تفصيلة وببتسم 
من جوة قلبي 
كل الكائنات اللي حوليا بشر او حيوانات بيتحولو فجاة اطفال 
وسعات عواجيز وسعات شياطين وملايكة وبخور 
ايوة بيتحولو بخور عادي جدا 
" ماتقوليش ان فكرة حد يتحول طفل دي منطقية "
بس الغريب انها بتحصل بشكل مستمر 
سعات كدة  بقعد مع حالي لحالي واغني اغنية ماحدش يعرف عنها حاجة 
بتحصل في ساعتها وتنتهي في ساعتها 

........................................................
خرجت اتمشى شوية مع حالي لحالي
وحطيت الهيد فون في ودني 
وسمعت " الله كبير "
وبعدين مسحت اغنيه محمد منير " علشان يشبهلك "
لاني اخدت بالي من تفصيله كده 
ماينفعش نحب حد علشان شبة حد تاني 
ده ظلم او خيانة او بطاطس 
ورحت على القهوة حطيت علبة السجاير والموبيل والمفاتيح والولاعة 
وصورتي خرجتها من المحفظة وحطتها قدامي 
وقعدت اتكلم مع نفسي 
حكيتلي حاجات كتير وحكيت عني حاجات كتير
كنت مهتم الاول بالراجل العجوز اللي باصص عليا باستغراب 
بس بعد شوية نسيتة لما لاقيت نفسي بتواصل مع حالي 
اتسعت الرؤية 
قولت كتيرررر وحكيت بطريقة مافيهاش نقد او موافقة 
قولت حاجات  
ماقولتهاش قبل كده لنفسي ومش بعرف اقولها بسهوله 
يمكن انا قولتها سعتها علشان كباية القهوة كانت مظبوطة مش زيادة 
او يمكن اضائة المكان 
او علشان شوفت صديق الطفوله " احمد حمدي "  عندو شلل نصفي 
ماعرفش 
ومش عايز اعرف  
خلصت كباية وخلصت رغي وتفريع وشحن وتفريغ وشحن وتفريغ 
اتمليت وفضيت 
*الشارع سكات خالص 
* اصوات قطط بتتخانق 
* طفيت اخر سجارة وبصيت لفوق 
...................................................................





" مقطع اخير "
لما النخيل اتفرد 
على شط اوجاعك
حدف البلح على الارض 


........................................................
معلومة : 
لم ينجح بحثك عن ......................................... في إظهار أية نتائج




.......................................................

http://www.youtube.com/watch?v=gqcxmEuswHg
اثار على الرمال 

http://www.youtube.com/watch?v=S6yuR8efotI

مقطوعة لــــ BACH

تفريغ .. كلام فارغ

كان نفسي اسال الناس اللي وقعت من حياتي في الكام يوم اللي فاتو دول 

*عاملين ايه ؟

* انا فرقت معاكم ؟

* هل في ذكريات لسه باقية في دماغكم معايه ؟

* انا زفت مثلا ؟

......................................................

بس كمان بسال نفسي ازي الايام دي بيدخل في حياتي كائنات جميلة خالص 

وصافية جدا وطاهرة كمان جدا 

( "هامش"

تراك.. اثار على الرمال ... زياد الرحباني )

قد ايه يا اخي الواحد بيشوف العجب في الطريق 

كل يوم بيحصل مشهد هو الوحيد اللي بيفضل ثابت من اليوم كله

من غير تحليل وتفحيص وتشخيص , بكل سهوله بيحصل وميض 

دليل ثابت في نفس تاثيرة ومختلف في التفصيلة 

معجزة مصغرة كده على غفلة 

....................................................

شايف نفسي بوضوح الايام دي 

مبتسم وراضي  من غير سبب من غير مبرر للهدوء الغير نسبي 

 عندي حاجة  بتقولي
  انا ماخنتش حد 

ماكدبتش على حد 

كنت واضح جدا مع الجميع 

اقصى حاجه عملتها اني شتمت ناس وكنت قليل الادب 

وسببت ليهم شوية مشاكل 

" بس  طز "  

انا طلع دين امي .. وبطلت اسامح في التمثيل 

ماهو القهوة والكوخ والشارع مش مسرح خصوصي ليا 

يعني لا للتمثيل المباشر 

( حابب تمثل عليا مثل قدام الناس كلها مش معايه انا بس  )

شوية المواضيع اللي كانت متعلقة وقعت بفعل التراكم 

حصل زحمة في دماغي .. وانا بحب دماغي للاسف 

بظن انها في الخلاص  ليا 

....................................................

بتركب تاني وبتعالج من العطل والضرر بكل سهوله 

على غفلة بردو .. بيحصل ده  

وبيحصل كمان اني بنسى الاوجاع بكل سهولة 

اخر تجربة عشتها اتعلمت منها شوية حاجات مهمة حتاكة 

منها :

1- اني عرفت اني عندي مشاعر كتير لسه ماخرجتش 

2- وانا اقدر ادي حببتي ايه 

3- وازي اعرف اختار 

4- و المعني الحقيقي للوجع 

5- الكدب هو ابو الشرور 

6- احترامها ليا 

7-  اللي منك منك " ودي اكيدة جدا ومباشرة جدا وفيها المعني الواضح   "

يعني بتحسك بجد بتعرف تسمع كويس ... مابتقولش اي عدس .. مش ممله 

بتعرف تسرق منك حزنك ... بتعرف تقول كلام في مكانة ... مش بتكسفك خالص وسط الناس .

8- الحضن .. لما احضن واحدة هاحس في حضنها هي حببتي ولا بلح 

9- خصية الشم .. بقيت بشم البشر وبقفش مدعين الانسانية والاشباح

10- ماينفعش اصاحب واحدة مابتفهمنيش اصلا مستحيل مستحيل مستحيل 

..........................................................

عن البلح اقول :

لما بقعد في حتة فيها كلام مابيعجبنيش بقول بلح بكل سهوله 

" بلح " عارف فكرة الاندفاع من فوق الزحليقة 

بالظبط بحس نفس الشعور المفرح ده لما بمشي من قعدة ممله وناسها " بضان "

اقدر اقول بوضوح " انا عشت فترة فوق نخلة .. مصنع البلح ذاتة "

كل اللي خرجو من حياتي كانو بلح 

" اللي مدعي / ة .. واللي كداب / ة .. واللي بيظيط .. واللي خاين / ة .. واللي شبح "

كلهم في مزبلة الذكريات :D

انا ليا بكرا بكل البراح اللي فية 

وكل احلامي في الموسيقى .. و غير كده هايكون في اطار البلح 

والبلح مفيد غصب عن مستوى فهمك للمسالة 

انا فهمت هو فين وازي وليه وامتى ومبسوط 

............................................................

ملحوظة : 

كل المشاعر اللي كانت بيني وبين اي حد كانت بجد 

يعني حبيت بجد وغضبت بجد وزهقت بجد 

واحتاجت بجد وفهمت بجد 

دلوقتي اقدر انام وانا مرتاح 

http://www.youtube.com/watch?v=gqcxmEuswHg

الساعة 7:54 ص 

طلبت معايه اكتب

انهاردة اكتشفت قد ايه حياتي مضحكة ومليانة تفاصيل شبة الافلام 
يعني زاويا  الاضائة وحركة الناس ..  والتفاصيل 
" التفاصيل هي المعجزة بس تقولها ازي .. #  انا بعرف احكي  عارف #  "
يعني مثلا انا كل يوم اخرج اروح وسط اللبلد لازم ارجع معايه " مناديل " مع اني مش بستخدمها اصلا .. بس بحب العيال الفضائيين 
وانا ماشي في الشارع بحس اللوان لبس الناس عامله هارموني مجنون 
 ( ملحوظة 1: 
" هاحط تراك شبة الحاله دي تحت .... انا مشغلة اصلا دلوقتي وانا بكتب " )
وكمان سعات الناس بتعمل حركات مضحكة على غفله
" يعني ممكن وانا بشرب كباية القهوة الزيادة بتاعتي .. اشوف واحد # بيتاوب # بشكل مضحك " 
أضحك في سري .. والضحك في السر  حلال جدا ياناس 
اما عن حركة المرور .. عبثية والناس بتجري شبة الموج بيسابق خيال الانهائية 
الخوف المستعار من الحديد واصوات كلاكسات الازعاج وصوت بنات بيضحكو من بعيد
والاحساس بتاع اليوم اللي  قررت فية اغني بصوت عالي في الشارع 
وكل بنت حبتها ومسكت اديها وعدينا طريق للمسحيل في المستحيل 
ومحلات الكشري وشطة ابو طارق و اصحابي المتنطورين على القهاوي 
ونظراتي المسروقة مني على الشجر 
وترنيمة " جسر القمر.. لفيروز .. هي مش ترنيمة بس ترنيمة  " لما كانت خلود بتفضل ساكتة كنت بقولها بس هي ماكنتش بتسمعني .. او كانت بتسمع بس كانت ساكتة
انا كنت ديما بدور ليا على طريق للسعادة في وسط كل الاحداث 
1- كان فيا شيى مبتسم وشيى حزين 
مع عد وتركيز في السنين 
وحسبة شبه مفهومة 
عرفت انا ليه اتاخرت
وسرقت ايه.. من مين 
وايه اتسرق مني
ومين كان نور ضعيف 
ومين كان ظلمة عندية 
2- وقد ايه قالو حبيبي 
وقد ايه صبح الفراق لحظة 
خوفت من شبحي اللطيف 
واترميت ع الارض سكران ضعيف
كنت بسرق من سعات الوحدة الحاني 
كنت بعشق عنيكي وانتي حباني 
كنت لسه  بقولك انا كنت موجوع
...................................................................
كان عندي مشكلة ظهرة من حبة , مع الضحك 
انا موافق جدا على الضحك .. بس في شرط واحد مهم جدا 
سبلي مساحة اضحك انا كمان " يعني ماتضحكش عليا طول العمر "
>>>>>>>
اليكم التراك :) صحيح انا بتنفس كويس الايام دي وراضي جدا بكل حاجه واي حاجه 
حاسس  اني جوايه سلام نفسي رهيب 

http://www.youtube.com/watch?v=nkxgQdeU968













الساعة 5:32 ص

دش سخن

* قررت اشتغل مع ابويا في الجراش تاني " لازم اجيب فلوس كفاية وجع من الفقر "

* قررت ادوس على قلبي بالجزمة " لازم انساها  كفاية هبل "

* قررت اكون بند تاني هانتحت في الصخر علشان حلمي

* قررت اغنيلي دلوقتي حالا اغنية وماغنهاش تاني 

* قررت اعمل مفجاة لكل الناس اللي بتحبني اولها قصايد شعر :) 

" لزينب ... ورحاب .. درة ... سامح .. سمير .. ميدو "

* قررت اهتم بصحتي لاني خسيت جدا 

* واخيرا قررت اطول شعري زي زمان :D

................................................

كل الحاجات دي هاكتبها في ورقة وهاعلقها عندي في الكوخ قدام عيني 

وكل ما اخلص حاجه هاشطب عليها 

ولما كلهم يخلصو هاعمل واحدة جديدة 

...............................................

العيد عند النحاس مع صديقتي الجميلة " غادة "

او من غيرها بس النحاس في العيد حل 

الساعه 30: 12 ص

ولكن 

مفتاح بيلعب

رشاد : ممكن تعزمني على كباية امل صافي .. في ليالي الخريف المدهشة 

محسن : جدا يا حبيبي بس انت انزل من دماغ الولد وانا هاعزمك 

رشاد : لا يا حلو انت الاول انزل 

نجفة : دي كده تبقى عزومة على الانتحار .. رشاد انا مش مستغنية عنك 

مفتاح : انا فتحت علبة مش مكتوب عليها حاجه تعرفو شوفت ايه 

رشاد : شوفت ايه يا تاح 

مفتاح : شوفت شيكو قاعد مع بنت على قهوة وفي واحدة مجنون حدفت كباية فاضية 

تحت رجلة كانت هاتعورة 

نجفة : ينهار اسود .. وعمل ايه 

مفتاح : كان متسامح جدا بس البنت اللي كانت قاعدة جانبو كانت هاتكولها 

نجفة : وشفت ايه تاني 

مفتاح : شوفت شيكو حاضن بنت وبيقولها انا " حبيت " وكان شكله دايب على الاخر 

نجفة : وبعدين 

مفتاح : البنت مشيت وفضل وش من الحديد مبتسم 

محسن : انت يابني ماتقول تفاصيل 

مفتاح : لا مافيش تفاصيل الموضوع مشوش جدا كفايه اني شوفت 

رشاد : كمل يا تاح 

مفتاح : وفي مشهد شيكو كان سكران جدا في الكوخ وكان لوحدة ووقع من كتر السكر 

تقريبا المشهد ده واضح اكتر لانه كان لوحدة .. كان شايف الحاجات بتتحرك بشكل مرعب جدا ... وقع على الارض وصحي الصبح واكتشف انه سجل تراك اسمو

" نشاز "

نجفة : كل ده جوة دماغو واحنا مش عارفين .. ينهار اسود 

السيد سعد : علشان كده مش عارف ادعم الولد 

محسن : في حجات تاني يا مفتاح 

مفتاح : اه في كتيررررررررر جدا  وكلهم منعكشين جدا 

نجفة : طيب قول شوفت ايه تاني 

مفتاح : شوفت شيكو وهو بيجري في الشارع بسرعة كبيرة  كان لواحدة 

رشاد : مافيش اي معلومات 

مفتاح : لا مافيش اي معلومات 

شيكو : عاوزين تعرفو ايه تاني 

الساعة 5:58 م

شوية كده

انهاردة انا عملت اكتر شيئ بعرف اعمله 

اكتر شيى مني وفيا وليا وعني 

اكتر شيى بيطمني وبيخليني افضل مستمر 

انهاردة لحنت لعمنا " فؤاد حداد "

القصيدة اللي كانت بتطاردني 

"  ادي ايام العجب والموت "

هاحط اللينك بتاع الاغنيه تحت 

......................................................

قرار1 : ماكتبش تدوينات عن تفاصيل ممكن تكون مش مهمة لبكرا 

خليني اكتب عن الخطوط العريضة بس 

انا بطل حكايتي .. وشاهد عيان على الحدث والحادث والحديث 

علشان كده مش هاكتب في تفصيلة صغيرة كلام كتير 

لان الحياة فيها تفاصيل عريضة 

" عملت انهادرة بنت ازي تخرج من الوجع "

" ونرمين اتصلت بيا علشان الدرس بتاع الجيتار وخدت فلوس "

"  وشوفت خلود انهاردة "

" ولحنت اغنية ادي ايام العجب والموت "

كل اللي اتقال من شوية ده نفاصيل صغيرة مش بتحييني ولا بتموتني 

هي اخرها توجعني ساعة او اتنين او تسعدني ساعة او اتنين 

لكن الاكيد ان كل حد من اللي مذكور بين قوسين 

كان عاوز مني حاجه 

في اللي عاوز من روحي 

واللي عاوز من جسدي 

اكترهم وضوحا بيستمر في حياتي 

واكترهم غموض بيختفي بسرعة تلحيني لاي تراك :)

قرار 2 : مش بالساهل هادخل في علاقة لاني عرفت انا بدي ايه 

وبعرف اعمل ايه 

وتاني حاجه  انا كائن صعب التواصل معاة 

انا ممكن اكون مكتئب جدا من غير سبب ويتضح ان الحاله دي بسبب تراك جديد

وسعات بكرة الكلام في المطلق وسعات بحب الكلام 

اذا مش مشكلة العالم دي 

دي مشكلتي انا وانا راضي بيها وفاهمها 

ومن هنا بيجي القرار لو ماكنتش بنت عظيمة جدا وواسعة من جوة 

او بمعني ادق  مليانة براح وبنت بلد بجد عارفة ايه الصح وايه الغلط والاصول 

ماتلزمنيش 

على راى " ثروت " ابويا انت ماتنفعش اي واحدة انت لازملك واحدة من التوكيل 

وقالي كمان : انا ممكن اجيلك البيت الاقيك معلقها في المروحة :D

اذا " لا ضرر ولا ضرار "

اخر علاقة عشتها عملت معايه الصح والواجب 

واخر يوم بالتحديد قولتلها  " انا حبيت كنت بدوب بالمعني والمضون "

ماظنش اني ممكن اوصل للحاله دي  تاني  بسهوله

وماطنش ان ممكن ادي ثقة في حد تاني  

هنا ماسميش معقد .. هنا اسمي مش عاوز 

علشان تخلص التعويذة اللي انا اتكلمت عنها حالا دي 

لازم مفجاة اكبر من ادراكي بالاشياء

 " يعني اتخطف .. لدرجة اني ماقدرش اقاوم السحر "

وده مش بعيد على الصدفة 

( اكتشفت ان في ناس بتقراء التدوينات بتاعتي كتير )

وفي نفس الوقت مش بيقولو اي تعليق 

بصراحه بحس اني محتاج اشوف تفاعل الناس معايه ورائيهم 

او كأن شيا لم يكن " عادي يعني "

......................................................

الليكم اللينك

 ملحوظه : اللي وخدين بلوك مش هايعرفو يسمعو :)

ملحوطة 2 : التصوير ده كان وانا بلحن التراك  

يعني كله في نفس الوقت :)

http://www.facebook.com/photo.php?v=10151271756455993

الساعه 6:30 ص

اخر الاخبار

اخر الاخبار 
* فشلت في محاولة السفر طلع الموضوع " نصب "
* لسه مفلس من امبارح 
* اتصلت بيا بنت صديقه وعرضت عليا انام معاها بشكل صريح " وانا قولتلها لا "
بس مش هاخسرها 
* عايشة فترة من الاندماج مع الذات " وتقريبا هاغير ارقام التليفون بتاعتي "
ده احتمال بس مباح 
* ليا اصدقاء مش مقربين اتحولو لاصدقاء مقربين والخمس بنات صفصفو على صفر
وطبعا انا بضحك جدا " هما كانو عاوزين يعرفو مين الكائن ده وعرفوني وخلصت "
* ابتديت اتحرك بعد ما عرفت مشكلة الشيخ امام ايه هي
" وتقريبا الموضوع بيتكرر معايه "
* قعدة اقراء التدوينات القديمة بتاعتي حسيت اني عاوز اطبطب عليا جدا 
* عندي الايام دي حاله من الرحمة والغضب في نفس الوقت مش باخد موقف كامل وممكن اغير رؤيتي للحدث 50 مرة في الثانية 
* الجوع بيعلمني درس كبير جدا اكبر من اني اكتب اصلا تفاصيل صغيرة او احوله لجمله كبيرة 
* بقيت اخاف ادخل في اي علاقة جديدة بسبب اخر علاقة ليا 
تقريبا علشان كنت مصدق فشخ او علشان حصلي تطور في دماغي وبقيت بشوف بعمق 
حضرتك انا عندي 27 سنه واظن اني عشتهم بشكل مناسب 
* اتكلمت مع ميكل عادل صديقي الشاعر بعد البروفا بتاعتنا امبارح 
قولتله : يا صديق الحن كلام هجس واجيب فلوس 
قالي : اي حاجه غير الجوع حلال 
" بس انا حاسس ان النظرية فيها خلل المعادلة كلها من جوة وبس "
* ظهر عندي شيى جديد اسمو " الاحتمال " يعني كل اللي حصل في حياتي من فترة 
كان ممكن يكون حاجه تاني غير اللي انا فهمتها اصلا 
او بالغت في فهم الاحداث .. وحكمت وانا تحت تاثير مواقف وضغوط نفسية 
احتمال كبيررررر  جدا يكون ده المخرج الكبير للمشكلة العامة لروحي 
* زهقت من كتر مابسمع كلام شكر فيا .. ومن نظرات الانبهار باي خرف بعملة 
يلعن دين ابوكو انا مجنون ومش مقياس لاي خرة في  اي حتة 
..........................................................
عن المدونة ذاتها 
" الوقت اللي بيبقى تحت التدوينة
ده غلط انا هابداء  اكتب وقت التدوينة في التدوينة ذاتها اليوم هو بس اللي صح  "
........................................................
انا حكيت حكايه " لخلود .. وشادي ... وهواري  " بس 
الحكايه هي اني غنيت مرة في شارع الهرم قدام السكرانين 
علشان اجيب فلوس للجامعة 
انا مش هاعمل كده تاني مش هاعمل اي حاجه اتكسف منها 
انا فني ارقى شيى فيها واغلى شيى كمان 
هو الحتة النور الوحيدة والاخيرة جوة قلبي وانا مش هابوظها 
.......................................................
واخيرا لكم كامل الشكر والاحترام والتقدير 

http://www.youtube.com/watch?v=nBDvIAe_p2s

الساعه 12: 7 م

خير ولا شر ولا نور واتجاة للسير

في اخر الليل وبعد بروفا وغناء كتير 
كان معايه 4 جنية بس وكان لازم اكل علشان جعان وكان لازم اركب من الجيزة علشان ارجع البيت 
كان الحل اني امشي الطريق عملت كده فعلا من ميدان الجيزة لحد الجامعة 
" مشوار محترم " قعدة ارتجل شعر كتير تقريبا فعلا ده " موسم الشعر " 
صحيح انا مش بحب الخريف ولكنة ارطبت معايه بالشعر خلاص 
تعبت من كتر المشي ومن كتر الشعر اللي نازل كمان المطر
قررت اركب مكرو باص 
الفلوس قلت جنية اتشريت بالباقي واحد " مولتو " وسجاير فرط
ورجعت الكوخ واترميت على نفس الكرسي الخشب ابو حضن 
وبصيت على الحيطة صحيح صورة المراجيح  جميلة وصورت ابو قردان منطقية وشبهي 
انا بحب المكان ده
صحيح انا نفسي اتحضن اوي لحد ما انام " ولكن " مافيش 
برد الوحدة مابيدفيش 
صحيح انا تعبت جدا من كتر المشي 
ولكني قولت شعر كتيرر طبعا مش فاكر منه حاجه غير 
( بيقولو مش شغال 
وانا بشتغل نفسي 
عمال اكتب في شعر 
واسمعو لنفسي 
بغني على نفسي لنفسي بنفسي )
صحيح ماعييش فلوس ولكني على الاقل كلت 
واشتريت سجاير كمان :)
متدايق من مواقف كتير حصلت ونذيف وجع 
ولكن التراك اللي شغال حالا" اللينك تحت " كالعادة جميل وطيب دافي اوي شبة كباية الكباتشينو اللي بالفانليا 
او شبة حضنها اخر مرة 
صحيح وحيد جدا في ليل ممل 
ولكني لسه بقدر اعمل حاجه 
حاجه واحدة او حاجات : 
بستمر وبعاند وبعافر 
بقاوم حدود المستحيل الحي 
وبهرب من السور كأني فراش 
بضحك لما اشوف اصحابي 
ببكي الحلم لما بيتقلب اوجاع 
وبسكت لما احسك انك عاوز تحكي .. وشرقان كلام  
...........................................

مابحبش  فيا العصبية والغضب 
وبحب شكل وشي وانا مبتسم .. الواد احمد هواري قالي انا بحبك وانت مبتسم :)
وانا كمان يا عم بحب شكلي وانا مبتسم
.......................................... 
تعرف يالي مش عارف انت مين انا كائن صعب التواصل معاة 
انا مليون حاله في بعض 
بمل بسرعة جدا وبفرح بسرعة جدا وكل شيى بسرعة 
الا  الامان بحتاجة ديما 
بص 
...........................................

ليكي يا امي :
طبعا انا عارف اني مش بتقري التدوينات بتاعتي 
انتي قولتي مش هالعب من زمان 
بس بصراحة وحشاني 
ايوة هو كده انتي وحشاني وانا لو شفتك صدفة في المنام 
حاضنك جدا 
ومش هاسيبك حتى لو فضلت نايم للابد 
اتعمل معايه الغلط " طبعا دي مش لغة حوار اتكلم معاكي بيها "
بس انا عارف انك مش شايفة ولا سامعة اللي حاصل 
حاسة ؟
مش عارف .. بس هاقول ياريت ماتكونيش حاسة بيا دلوقتي 
الوحدة يا امي مقرفة 
اه صحيح عمتي رجعت تعاملني  وحش تاني ومن غير سبب 
انتي فاهمة هي مجنونة :D 
بس بردو هي ليها حق 
هاتحبني ليه يعني 
اللي بيني وبنها ابويا وانتي فاهمة 
اه صحيح انا روحت انا وهو لمي 
بنتك كبرت يا حجة واتجوزة 
بقت عروسة جميلة خالص :)
البت مي بقت بتحضني بحنان وبتتصل بيا كتير 
وبتلومني اني مش بتصل بيها 
بس اوعدك اني هاتصل بيها بشكل مستمر 
انا زعلان منك
  بس ماتزعليش مني السعادي 
سمحيني وخليني اقول وخلاص 
ولا اقولك مش هاقول تاني 
..........................................................................
التراك يا عباد الله او عباد وبس 
http://www.youtube.com/watch?v=oTEFiudeDyg

خرودة

تجميع الخرودة وتحويلها لتماثيل شيى عظيم 
بس المشكلة انهم هايتحولو لتماثيل 
" ده كلام عاقل جدا مع الجماد"
ولكن الانسان ماينفعش يتجمع ويتلمع 
هو بس اللي يقدر يعمل كده لنفسه بس 
وهنا لا يصلح الشعر والغناء لتغيير النفوس 
....................................................
خير الكلام ماكان مناسب للتفاصيل وواضح وضوح الشمس 
....................................................
انهاردة كان "  كاب دور " ممل 
وكان السكرانين صوتهم عالي وكان في حاله من الغباء في الحديث 
كان كمان في موضوع داير بيني وبين صديق ليا " صديق من اللي بجد "
بيعتقد ان الناس ممكن تتصلح هو طيب وانا كمان طيب وعارف 
بغض النظر عن التفاصيل اللي كانت بنا 
انا خدت بالي من حكاية كده بتقول :
ان الناس اللي بتتعالى على ناس " مش ناس "
وان البشر مش حقول تجارب 
وان الاصيل لما بيسامح بيكون موجوع " وماينفعش يصالح خسيس "
وان اللي مابيحسش بالم الغير كلب ولا يسوى 
وفكرة اعمل الخير وارمية البحر مش مناسبة لكل الناس
" لان الخير نسبي ومافيش بحر "
.............................................
اما عن بكرا فا هو هايكون احسن من انهاردة 
ده بس الاكيد 
............................................
اه صحيح حبي وعيشي ما احلى الحب 
انا جرب الاحساس ده قبل كده وطلع عظيم .. اعملي كده في اسرع وقت ممكن 
هايعالج حاجات كتير جواكي 
بس" كل شيى الا الخيانة ياجوز "
...........................................
وانا هارسم بحر كبيررررررررررررر 
وهرسم سماء وهاديلك مساحة كبيرة تشوفي منها الضوء 
...........................................
سعات بخاف اقولك فيا ايه لاتموتي من الوج

تفاصيل وقعت بسبب الدوشة

( هذة التدوينة  تحت تاثير اغنية " انت عمري" ام كلثوم )
صحيت بسبب كابوس " مش فاكر اي تفاصيل منه خالص " وده احسن بصراحة 
الواحد مش ناقص وجع على الصبح
الايام دي قصيدة " ايام العجب والموت "  بتاعت فؤاد حداد  بتطاردني 
...........................................
عن تدوينات خلود اكتب :
تفاصيل 1 + تفاصيل 2 = فيهم تناقد كبير واختلاف غير منطقي 
بيختلط فيهم الواقع مع الخيال مع العبث مع المصداقية 
" دوشة منظمة او تنظيم للدوشة " 
بس فيهم امل بنسبة كبيرة ... ( امل في اني اقراء) 
مش مهم انا شايف ايه ولا فيا ايه ... المهم انها بتحكي 
الفرق هنا اني لما جيت اكتب عنها كنت قاسي جدا وكنت بشتم في المطلق 
لاني موجوع .. وكنت قرفان جداااااااااااا
بالصدفة هي قالتلي عن طريق التواصل العجيب .. انها عرفة ليه انا بسب 
وببقى عصبي وانا سكران .. وانها عاوزة ترجع 
وانا هديت جدا عن الاول
( تقريبا مابقتش موجوع زي الاول او عديت حاجز الوجع ذاتة )
زي ما هي قالت في نهايه التدوينات " فات الميعاد .. وكأن شيا لم يكن "
مش هانكر خالص ان كان فيه ايام حلوة وذكريات جميل 
وتفاصيل عبقرية جدا .. انا حتى اتخصيت لما لاقتها كتباها بالشكل ده
كنت قبل التدوينة الاولي " تفاصيل 1"
بتسيطر عليا فكرة انها بتحب تاذيني وبس 
يعني هي مصدر كل الشرور 
بس بعد التدوينة حسيت انها فيها الخير 
مش هاقدر انكر بردو اني شوفت معاها وجع ماشوفتهوش في حياتي 
من بعد موت امي اصلا  " تخيل بقى "
طبعا الميزان هايطب عند الوجع لانه اكتر .. الاغرب بقى اني عارف انها عارفة 
في تفصيلة بخط عريض شبة ده 
انا كائن بيحتاج كلام الحقيقي وصدق اكتر مابيحتاج ياكل ويشرب وينام " وبيعني ديما اللي بقولة .. وحببتي هي الكون .. والكدب اعظم من الخيانة عندي وبعرف اشوف واحس واشم الناس كويس 
نرجع للخط الطبيعي بقى 
( الجزء ده يخص خلود  بس )
خدي عندك مثلا :
*انا كان عندي من فترة فكرة اني اتصل بيكي علشان احضنك بس وامشي  
* لما سمعت من كائن اول امبارح عبث كالعادة عنك قولتلة دي كانت حببتي ماتتكلمش عنها كده .. طبعا بصلي بنظرة تشبة التهكم وانا ابتسمت من قلبي .. وانتي عارفة شكلي لما بضحك من قلبي 
* كنت بستنى اتصال منك بيقول انا في الدقي ولازم اجيلك حالا الكوخ 
* وطبعا بتابع التدوينات بتاعتك 
* لسه الحاجات بتاعتك موجودة بس في لوحة الكولاج انا بوظتها وانا سكران 
كتابة عليها " الفنانة "
( في تاني بس ده كفاية لانه منطقي جدا وعلى قدك عندي دلوقتي  )
يمكن انا صحيت يابنتي علشان اقولك الكلام ده في الوقت ده بالذات 
يمكن يدعمك يمكن يفرحك يمكن يحزنك مش عارف بس انا قولت 
...............................................................
ظهور 5 بنات في حياتي في نفس الوقت اللي انا محتاج فيه لاحساس عبقري 
والاغرب انهم مستنسخين من بعض .. بمعني انهم كلهم بيغرقو الدنيا حوليا نور 
طبعا انا فاهم كويس انهم منبهرين بأي حاجه في اي اتجاة 
بس بصراحة بيدولي طاقة هايله انا مسميهم وبنات بلدي الجدعان :)
ماظنش ان في حد هايتخطى المرحلة دي يعني مش هايبقى اكتر من لحظات من طرطشت النور 
وكمان بفكر اخليهم ييجو في يوم التعارف الخوزعبلي اللي بحضرله بقالي حبة 
بتاع الناس الجميلة 
هاعمل حاله من الفرحة في المطلق للناس ياترى هاينفع ده
...............................................................
مشاهد غريبة حصلت  فعلا  :
* وانا بسكر مع حالي كا عادة الايام دي في بار " كاب دور "
شربت خمسة بيرة وده في حد ذاتة مع قوة المكان معجزة 
انا بشرب اتنين بس وبسكر لما بقعد هناك 
المهم سكرت فعلا  وغنيت " مسكينة حببتي السمراء " لــ منير 
في راجل كان قاعد لوحدة هو كمان وكان قدامة 3 بيرة وواحدة براندي صغير 
قام بيتطوح وقعد جانبي وقالي :
-انت صوتك حلو ... غني 
 - قولت انا كنت بغني وانت خلتني ابطل اغني 
- قالي انت لما تغني الناس هاتتلم عليك ده الطبيعي انت زي السكر 
-قولتلة بس انا مش جماد انا مش سكر 
- قالي انت ولد دماغك نشفة فكرتني بيا وانا صغير 
-وهو بيتكلم رجعت اغني تاني لوحدي هو سكت وفضل يبصلي 
- بكى فجاة وقالي ايه اللي وجعك احنا سكرانين وهاننسى 
- وانا حكيتله كل حاجه وسمعني من غير ما يعلق 
وبعد ما خلصت كلام معاة مشي من غير مايقول اي حاجه 
والاغرب حاسبلي على اللي شربتة اصلا 
انا كنت سكران جدا لدرجة اني ماقولتش اي حاجه
 ولا حتى قولتله ايه وفين ومين وازي 
مسالتش خالص تقبلت وجودة وبس 
يمكن علشان شعرة الابيض 
يمكن علشان شبة جدي 
مش عارف بس كان مهم اللي حصل ده 
( انا بيحصل معايه كده لاني بشوف الدنيا بشكل مختلف )
ملحوظة : انا ماقولتش لاي حد عن اللي حصل ده ماحدش كان هايستوعب الحدث
هو هنا علشاني لوحدي وعلشان مانساش 
.............................................

مرتاح جدا بعد كتابة التدوينة 

ملخص

* ماشوفتهاش امبارح
* وسكرت جدااااااااااااااااا
* وانهاردة روح التحرير وكنت هاموت بس حبيت اللبلد تاني 
.........................
ممكن بق ماية 

لا توجد تعليقات

طبعا بعد شرب كوزين بيرة " يعني ازازتين " حصلت المعجزة 

....................................................

" مفتتح "

بسم اللغة والحرف والوجع

بسم الحنين والضياع والعدم 

بسم الموازين والسنين والمباح

..........

"  مقطع اول "

وطني جسدي 

جسدي وطني 

طولي وعرضي

وحبة براح 

تحت المطره

كان بينادي

تعالي في حضني 

بص في عيني 

حب ملامحي 

انا حبيت 

شوفت الحاله واتخضيت 

" مقطع ثاني "

مواسم شعر 

وحلم صريح

بحب البحر وعنيكي 

مواسم حب 

وادي قلبي 

بيتعجز عليك يا صديق 

ماترفضنيش 

وسامح روحي لما تغيب 

من البيرة 

الكون في قلبي رزاز 

وانا قلبي بيت بيتمخطر 

امون بيتشعبط على سن احلامي 

" مقطع ثالث "

انا الشارع انا العداد

انا بياع خطوط طيران 

بخاف  اطلع على السلم 

وبعرف اغيب

( وبعرف اسيب حبال الحلم على غفلة )

ودمي سال على الحيطة اونطة 

بحب كمان تعاويذك 

يا مش حاجه

" مقطع اخير "

لما النخيل اتفرد على شط اوجاعك

لما الحلاج اتصلب زي المسيح

وقع البلح على الارض 

واتولد طعم العبث 

واللي خاف خاف 

واللي شاف شاف 

واللي عارف سكت 

بوح بالسر يابن الكون 

sheko

.........................................

بعد الحادث المهم بالنسبالي وغير مهم بالنسبالك 

* شوقي  الغير منطقي لخلود راح 

* خوفي من المستقبل والفشل راح 

* اهتمامي بالناس اختل 

* بشوف بوضوح والدنيا كلها اتحولت لطريق عريض جدا 

* فهمت كويس اني لما بحب حد بديلة فرصة ومساحة كبيرة .. لو هو ماعملش كده يبقي بلاش منه اصلا 

* عرفت ان  سميرمن اكتر الناس اللي  بتحبني

 * عرفت المعني الحقيقي لكلمة  حب وراحة وامان واستقرار نفسي

* عرفت اني مش بخاف من الموت انا بس مابحبش المفجاة 

.........................................

بكرا عندي معاد مع البنت اللي كنت بحكي عنها 

جوايه اساله كتير 

من وسط الاساله دي 

" هو انا صعبان عليها .. هي بتحب صوتي علشان كده مشدودة ليا .. ايه التطور للعلاقة دي .. هل هي حقيقية زي ما انا حاسسها .. ازي اسمح لحد يخش قلبي بعد المقلب اللي لبسة "

........................................

الاجابة بكرا بعد المقابله :)

" اه صحيح التدوينة دي اسمها بدون تعليق بسبب الفراغ الكوني والصمت 

توابع

شوفت ناس كتير  اوي الايام دي وكأني بحاول اتدوش بالدوشة
مش فاهمني كويس .. وحاسس بتاثير الصدمة اللي حصلت ليا 
بشكل عميق وواضح
ببتسم في اخر اليوم اللي مليان دوشة وبحوش شوية راح من يوم المجهد ده ليوم تاني 
( بتسيطر عليا جدا فكرة ال  " بوم"  بتاعت الحادثة )

" الحادثة "

ابداء من عند النهاية " فلاش باك " يامحترم : 
عملت حادثة وكنت هاموت انا وهواري 
كنا ماشيين على الطريق الدولي مروحين للمدينة المدووشة 
خرجنا بعد الساعه 5 صباحا تقريبا 
ركبنا العربية وخدنا ارشادات السير " يمين يمين شمال على طول "
ووصلنا للطريق الدولي اللي منه هانقدر نروح للمدينة المذكور تصنفها فوق
وابتدت الرحله قولنا نحط بنزين علشان الرحلة بقي ونبقي في الامان 
عملنا كده فعلا
ورجعنا تاني نكمل الطريق 
واحنا ماشيين وقفنا واحد عسكري في الشرطة علشان يركب نوصلة معانه لاقرب دورية 
واول ما ركب الدنيا مطرت بشكل مجنون 
واستمر المطر ينزل ويذيد اكتر واكتر اتحول سيل ضحكنا انا وهواري ووقفنا العربية على جانب ونزلنا اتغرقنا خالص وركبنا العربية زي العيال الصغيرين بنستخبى 
وكملنا الطريق شغلنا اغنيه "ياشابة للشاب خالد  "
وقعدنا نغني وفجاة ( شوفنا عربية قدمنا واقفة في نص الشارع قولت لهواري شغل الانتظار وفعلا شغلنا الانتظار وقربنا جدا من العربية قربنا اكتر داس هواري فرامل وقفت العربية وفي ثانية عربية " لوري.. نقل ثقيل  " خبطت فينا اتفعصت العربية بينا 
والناس في ثواني اتلمت انا وهواري في العربية والناس بتصرخ برة العربية هاتنفخر 
بتالم وهواري كمان والعسكري اللي كان معانة دماغة اتفتحت .\ انا لسه خايف \
الناس بتشد فينا وفعلا خرجنا من العربية )
اتصلنا بالشرطة بعد ربع ساعه او اكتر من حالة الذهول  والرعب
الشرطة وصلت بعد مثلا نص ساعه
 الراجل اللي خبطنا بيقول انا عندي القلب وابنة بيعيط 
هواري بصلي هزيت راسي قولنا خلاص سامح ياعم 
ظابط الشرطة قالنا خدو ارقام عربية علشان تشيل العربية بتاعتكو 
وفعلا حصل اتصلنا بالمنقذ اللعين
الناس اللي خبطونا راحو والشرطة راحت وفضلت انا وهواري 
والعربية المتفعصة وفكرة الكفته 
وقفنا في الشارع العريض بنرتعش من اثر الخضة واللبس المببلول بفعل المطر 
لوحدينا في  الطل في الفراغ فجاة هواري مسك الجيتار بتاعة ولعب مزيكا 
وانا غنيت عملنا اغنية علشان الموقف ده وقررنا مانغنهاش خالص 
هي بتاعت المشهد ده 
" كانت اغنية مضحكة جدا وانا مش عارف جبت اللحن والكلام منين "
بس قعدنا نضحك جدا 
 قولت لهواري انا وانت والاسطورة بتاعتنا مستمرة 
..................................................

( دلوقتي هاقول حاجه مهمة اوي .. انا كنت هاموت بس عشت علشان شيى معين 
في حد محتاجني اكيد ... في حاجه لازم اعملها .. في  لسه مزيكا .. لسه في شيى عم بيصير وشيى بدو يصير ... لسه ماحضنتش ابويا اوي .. ولسه اصحابي بيحبوني لسه لسه لسه لسه  )
.................................................

" من أنا لأخيب ظن العدم "
محمود درويش 









ارجوك

هذا الصباح الرائع :)

حاله من الانتعاش الصافي

.....................................

موسيقى عبقرية شغاله حالا وانا بتكتب التدوينة دي طبعا هاحطها ليكو في الاخر كالعادة 

شوية معلومات عن المدونة بتاعتي 

اولا : عدد مرات المشاهدة 7.550 ده لحد دلوقتي حالا 

وطبعا انا مش مصدق الرقم الخوزعبلي ده لانه كبيرررررررررررررر

بس هما مش هايشتغلوني :D

عملت موسيقى اسمها " هبوط اضطراري "

مجنونة .. شبهي 

وكمان هابداء في حط الخطة المجنونة بتاعت (  المدينة الفاضلة  )

طبعا مش زي افلاطون هي مصغرة جدا تناسب بالظبط الواقع 

صغير كده ومحندق

الخطة هي عبارة عن يومين 

اليوم الاول : هاجمع كل الناس اللي انا بحبهم " في مكان واحد " 

وهاعرفهم على بعض كلهم .. وهاحتفل بيهم :)

اليوم الثاني : هاجيب جزء من البنات اللي كنت  بحبهم والموضوع باظ 

مع بعض  بردو وهافتح حوار طويل عن العيوب والمشاكل اللي عندي في العلاقة 

طبعا ده جنان بردو بس انا موافق .. بصراحه هاتجنن واشوفهم كلهم مع بعض 

وبفكر اتصور صور كتير معاهم كمان :D

....................................................

شايفني مجنون ولا ايه .. ولا اقولك صدقني

انا هاخلي الموضوع يروح في الحتة الحلوة 

اما عن اليوم الاول هايكون يوم عظيم جدااا انا واثق من ده 

هايكون من اهم الاسماء الموجودة 

" كريم .. سامح .. ميدو .. النحاس .. شيماء .. درة .. غادة "

واحتمال اعمل مفجاة كبيرة كمان 

وكمان هاخد الجيتار بتاعي وهاغني ليهم 

(    ده التراك الاول )

http://www.youtube.com/watch?v=Vgo9av539gU&feature=related

( وده التاني )

http://www.youtube.com/watch?v=N07hAOrGO90&feature=related

وده انا وانا ابيض خالص 

علشان بكرا

علشان بكرا
انا هابداء من الاول واعيد تفكيري في كل شيئ واي شيئ  
اكيد هاستمر في اشياء ولكني هاعدلها .. هاكونها من الاول 
كل حاجه  هاتكون بتناسب احساسي والمنطق المناسب ليا 
علشان بكرا 
هاحب تاني واغني تاني وكاتب شعر وهاتمشى في الشوارع تاني 
علشان بكرا 
هاكون انسان بجد .. وهاخلي بالي من  النور في صدري 
علشان بكرا 
هسامح كل الناس وهاسمح لهم يدخلوني 
...............................................................

http://www.youtube.com/watch?v=lWhbsCdsru4