مزكرات غير كامله

بقالي فتره عايش في حضن الكوخ ..
شبهي اوي المكان ده
مجنون ... مش مترتب .... مليان تفاصيل ... هادي لدرجه السكون
سعات بحس ان الكوخ حافظ الاغاني بتاعتي :) ديما بيكون ساكت وبيكسفني
انا هاقول شويه زكريات من الكوخ ومني :
.
.
مش عارف ابتدي ازي بس انا هاقول اللي هاييجي في دماغي وخلاص
امي وجدتي والعجله والبندقيه الرش و وحاله الهروب من المشكله و عيون ريهام وهي بتقولي بحبك
واصحابي الطيبين والوحده والحطان المحفوره بفعل الزمن
وبواقي موسيقي قديمه اوي .. والبوم الصور اللي مافهوش غير صورتي
وايه تاني .........
اه
ولحظات اعترافي لنفسي
_____________________________
اعجب ما فيك يا جاهين انك بتشبه الحاله ومابتحكهاش انت بترسمها علي قد الروح
" اللي قابلته راح وفات الانين "
" حبيبي سكر مر طعم الهواء "
____________________________
فاكر شويه حجات من الحدوته
المهم اني فاكر و الاهم اني بحاول مانساش
بكرا مش طيب ولا جدع
بكرا يوم اخرس مابيتكلمش
وانا هاستغل الحكايه دي واتكلم معاه انا

عرايس الماريونيت

بعد الفاصل الكوميدي من الاحداث المصيريه للمواطن المصري اقدر اقول الاتي :
اني غضبان
اني زهقان
ان الثوره مانجحتش
وان الطوفان ماكنش طوفان
وان الناس اتحولت عرايس متحركه "ماريونيت"
وانا يسعدني ويشرفني اني اكون متفرج وف نفس الوقت بشارك فالحدث
من فتره مش كبيره اوي .. كنت كاتب اننا في فيلم وكانت حكايه الفيلم دي مسيطره عليا
اه طبعا انا عارف ان في ناس كتير اوي مش موجوديني باروحهم هنا هما بس اجساد
ومليانين شويه افكار واحلام وحجات من دي.
بس تعرف ... هما عرايس بردو ومصدقين الهدف الساذج ده
من كام يوم بالصدفه وبدافع من الوحده والملل قرارت اني اتفرج علي اي هسس علشان اضيع وقت لحد ما انام
المهم انا اتفرجت علي "مصطفي محمود" ولاقيته بيتكلم عن النسيبيه وانشتين وكده
قعدت اسمع وانا حاسس بسعاده وملل في نفس الوقت بس على غفله قال : الفرق بين الانسان العادي والعبقري ان العبقري بيقدر يخترق حجاب النمط والروتين وبيعرف انه يتخلص من الشهوات والرغبات زي الاكل والفلوس والجنس والخرف المفرح ده
جه في دماغي سؤال غريب هو ازي كان بيقول كده في مصر يعني للشعب ده
ف اخر الفيلم الناس بتقول الله شوف الرجل ده دماغه عامله ازي ده عبقري ..
بس ييجي زياد الرحباني علشان ياكد الحاله اللي جوايه الكلام بيفضل كلام
يا شعب مصر العرايس انا مليت من كتر المشاهده
كل يوم بخرج باشوف حجات عجيبه اوي وتوجع
وكل يوم بسال نفسي نفس السؤال هو انت بتدور ع الحجات دي ولا هي اللي بتلاقيك
وبرجع وانا شايل حاله من السكوت تكفي المحيط
وبرغم اني معنواتي .. مابغنيش
وبرغم اني سعات ببقي شاعر .. مابشعرش
وبرغم اني مش مصدق فالي ف السموات ... بندهه
وبرغم غباء الناس ودوشتهم .... نفسي احضنهم
وبرغم اني سعات بصرخ من كوني وحيد .... بتونس بيا اوي
انا عروسه ماريونيت فرحانه بشكل الشمس ... ولما تخرج تسيح تدوب
انا الخلصان بفعل النوم
سلام يا عرايس

مشهد ل اغتصاب

والمدينه متلخبطه جدا
مشهد ل اغتصاب كان هايحصل بس ربنا لحقها او الشرطه
كنت قاعد انا وجماعه اصحابي علي قصر النيل بليل الساعه 4 pm تقريبا
كنا بنغني وبنخلص في سجاير بعض كالعاده ..
وفجاه ظهرت بنت ماشيه وماشي وراها بتاع 15 موتوسيكل وعليهم شباب كتير
من الطائفه الشعبيه الغير سويه ....
قعدو يرخمو عليها واتكترو جدا عليها وهي ماصرختش حتي كانت مخضوضه
انا حسيت ان في " ادرينالين " حوليها بيشد الكلاب للنباح ..
والغريب انهم استجابو جدا للاشارات الهرمونيه اللي خرجه بفعل الخوف من جسمها
قمت انا واصحابي بسرعه جدا عليها علشان نفهم الموضوع
واحنا رايحين عليها كانت هما اتخنقو مع بعض
زي ما قولتلكو كلاب
وطلعو مطاوي واللي قلع الحزام
حاله من الفوضه الرهيبه
المهم واحد صحبنا خد البنت بسرعه علي عربيه الشرطه
وامين الشرطه راح علشان يعرف ايه الحكايه
بس الغريب انه كان ماسك " خرزانه "
انا ماضحكتش بصراحه
انا كنت حزين جدا علي الموقف ده
الناس كلها مشيت واحنا اصرينا انها تركب مع الشرطه علشان يوصلوها للبيت
بس طلع البنت هربانه من امها ... وهنا خد قرار الرحيل
انا انسان مكركب جدا وسعات بحس اصحابي فاكرني حزين انا بس بقيت بشوف حجات كتير ملهاش دعوه بحالتي
يعني ممكن اكون فرحان تحصل حاجه تبوظ الحاله بس بيتبقي شويه شراشيب من الحدوته جوايه ..
هو ليه
وكمان هو فين
وهو مين بالظبط
انا مش راوي انا الحكايه وبس

ماتت " فجله "

انا سكران جدا دلوقتي واللي مش عاجبه يخرج بسرعه
ومايكملش .
كان قدام الباب بتاع الكوخ في قطه صغيره كانت ديما بتطلع صوت عالي وكائنه صوات
او نداء للام او الرب اللي مش شايفها دلوقتي .
انا اكتشفت وجدها من ثلت ايام بس
وكنت فاكر ان امهه بتيجي تاكلهم ولاكنها ماكنتش بتيجي
انا عرفت المعلومه دي بسبب الفراغ او اهتمامي بتفاصيل ممكن ماتهمش حد غيري
قولت انا هاسبهم القطط دي ليها رب ياخد باله منها
المهم سبتها يومين وانهارده قول انا هاخدها عندي انا هاربيها
كانت ممكن تموت بسبب عدم اهتمام المسؤل عنها وعن وجودها
كان في قطتين واحد ماتت واتبقت واحد قولت هاربيها
ومسكتها بصيت في عنيها اوي وقلت انا هاسميها من احساسي بيها وهاتبقي كبيره سمتها "فجله"
ورجعت بعد احتفال مع اصدقاء ( سكرت وشربت حشيش كتيرررر)
لقتها ماتت.
هي كانت عاوزه تموت هي اكيد ماتت بفعل الملل زي " ايوب "
كانت فكرت الزبادي اللي جبتهولها مش كافيه
كان لازم اقعد معها
انا غبي
اهو القطه دي اتولدت للحياه علشان تتعزب حتي لما حد قال انا هاخدها اهتم بيها
ماكنش كافي
ماتت " فجله "
صاحبه الاسم المضحك
ماتت بفعل الياس
ماتت علشان ماكنتش موجوده في مكنها
ماعرفش السبب ولا العجيب فالحكايه ولا ايه اللي خلاني اتوجع
بس اللي عارفه ان الناس محتاجه فرصه تاني كل الناس حتي الاوغاد

انا مش فراغ في جدار الحياه

انا مش فراغ في جدار الحياه ..
انا مش شعاع للشمس عكساه المرايه
انا مش طاووس فرحان بلبس للعبايه
انا الغوايه
والمشابك ع الحبال
انا طبق ابيض وفاضي
انا الماضي
شربت ويا الكاس حكايه
شربني الكاس ثواني
بتلف الكلمه في راسي بفعل السكر
واديا ثابته كما الجبل
امبارح كنت فاعل
انهارده مفعول بيه
امبارح كنت شارع
انهارده شباك موارب علي القديم
هواء كتير يملالي جوفي
يمسحلي خوفي
يرميلي غنوه
تشربني جدا
وانا اللي كنت بقول : ماتشتريش الهواء اصل الهواء ببلاش
اشتريت بكل حاجه
انا ديما كنت فاشل فالحساب
ودي النتيجه
اشتريت عنوان لحاله
انا مش فراغ في جدار حياتي
انا اشترتني

شويه كلام ملخبط

بعد ما شربت بيبسي وخلاصت كام سيجاره في قهوه " افتر ايت "
قرارت انهي الفسحه هي كانت شبه شويه فكره الحدوته اللي لما تخلص
يقولك حلوه ولا ملتوته ... وانا عرفت من فتره ان كلمه مالتوته دي يعني متعاده
او ممله .
طبعا الخروجه كانت ( ) هواء
..........................................................
الايام دي بحب استخدم شويه الفاظ كده منها " الهواء ... والمافيش... المضمون "
وده كان ناتج عن حكايه .. ايه اكتر حاجه ممكن تقول المعني لحد
ومش لازم يكون الحد ده انا يعني .. بس زي ماتقول كده تقريب للمسافات
وانا بشوف في الايام دي الشوارع بجد
اه بصراحه الموضوع ظهر بسبب الافلاس فا كان لازم اروح مشي
:) وعرفت الحدوته
ان المسافه من التحرير للبيت بتاعي " الكوخ " بتحدد بالعامل النفسي
يعني لو عاوز ادخل الحمام اكيد جدا هاكون مستعجل او مثلا لو مصدع ومش حابب الدوشه
وزي كده كتير ..
الوقت اللي خرجت فيه ماكنش عندي اي مشكله مع الحجات دي
بس كنت عاوز حاجه هي ايه .. مش عارف
بس كنت مسحول جدا .. حستني كده
طبعا ركزت شويه زي عادتي في وشوش الناس حسيت انهم مش مني
تقريبا علشان انا كمان مش منهم .
..........................................
اتخانقت مع اهلي من كام يوم .
مع اني عارف انهم مشوشين جدا لبسبب انا ماعرفوش
بس حاسس انا مش زعلان منهم اوي دلوقت .. بس كنت زعلان اوي من كام يوم
هما مش موجودين ف الاساس
......................................
سعات بقعد اعمل اشكال عبيطه ب وشي في المرايه
علشان اضحك
وسعات وانا بعمل الحكايه دي بقف ابص لنفسي وبابص لعيني اوي
بشوفني وكانها اول مره
...................................
العيال اصحابي هايتجننو اصل الناس بقت عبيطه اوي
وهما بيشوفو تفاصيل كتير اوي
فابيحصل صدام طبعا صدام نفسي
بيقولولي الحكايه دي وانا ماعنديش حل غير الضحك
او النقاش في افتراضات كتيرررررررر
.................................
عن ال لا شيئ
شويه كلام مرسل لاشخاص
. . . . . . . . . . . .
وحشاني جدا . ( امي )
انا من زمان عاوز اقولك انك صحبي الحقيقي. ( غير معلن )
مش بحبها لانها مش شبهي انا هلاقي واحده تاني .( غير معلن)
غيرت فيك وانت غيرت فيا " الئ الجيتار "
لساك عبيط زي مانت ( غير معلن )
ايه ده امال هو ايه المعلن
المعلن يا سيدي حاله جواز
بين سندريلا وعلاء الدين
كانت لابسه فستان لونه ابيض جدا
وهو كان لابس لبس فارس
وماكنش في حصان ابيض
كانو ماشيين علي رجليهم
وكانت هي مبتسمه علي طول
انا اخدت بالي
والناس كانت بتسقف جدا
انا سقفت شويه واديا تعبت
وشغلو طول الفرح اغاني" للشيخ امام"
ولما روحت سمعت انهم شغلو اغنيه لفيروز
كانت " وقمح"
انا مزعلتش لاني حسبتها . قولت انا واحد بس وزعلت علشان ماسمعتش الاغنيه
لاكن في كام واحد فرح ... كتيررر :)
يبقي خلاص

اكشن

مخرج تحت التمرين بيلعب بافكاري ويكون مشاهد مش حببها ومش حباني
" صعب جدا اكون الشاشه والجمهور والحدث "
سعات بتخيل اني انا المخرج انا المسؤل عن الحركه والاداء
بس المشكله هنا
ان الناس سعات بتخرج عن النص .
وبتغير في تكوين الشخصيه
وده كتير جدا علي عقلي المريض بداء الشجر .
.......................................
دلوقتي كلمه مصر بتسببلي هم وحزن
دلوقتي الحنين للاشياء وصل لحد القمه
دلوقتي كنت لسه بعيد مشهد من مشاهد زمان
كل ده دلوقتي حصل وبيحصل مستمر
زياد الرحباني قال: ان ربنا مش ممكن يخلص
يعني تقدر تقول ان ربنا بيخلص " لا طبعا "
يبقي المشكله مش هاتخلص لانها بقوه ربنا علينا .
طبعا الكلام ده شكله جوافه جدا بس انا مصدقه
يمكن زياد ملخبط .. بس شبهي
......................................
فكره الاتوبيس اللي مليان ركاب كتير ومايعرفوش بعض
في فتره زمانيه كبيره اوي انهم يقولو لبعض ازيك " وابتسامه صافيه"
يحصل اختراع
خيررررررررررررررررر كتيررررررررررررررر
طظ فالاعارف والبدل الديقه
انا بحب شباكي وانت بحب الكلام اللي بيلمسك ويشبهك
الدرس وصل للجميع من اعداد واخراج ابن المفنيخ او انا التاني

اي حاجه

وبعد مقاومه شديده جدا والحاح من انا التاني
قرارت اكتب تدوينه
مافيش اي كلام ف دماغي دلوقتي وده في حد ذاته كلام
.......................................
ديما الدنيا في عيني مختلفه عن عينك والعكس صحيح
زمان كنت بسال امي هو انتي شايفه اللي انا شايفه زي ما انا شايفه ؟
كانت بتتجاهلني تماما .. بس بيني وبينك انا عارف ان الجمله متركبه غلط
وكمان انا كنت عيل والعيال كلامهم سعات مابيكنش مهم ( سعات )
انا مش شايف كده خالص لالالا انا مش شايف اصلا
هو انا ليه
......................................
السؤال الوجودي المتبععتر ده طظ فيه اساسا
هاقول شويه كلام مش هايعجب حد
انا بتخيل ان الناس بتدعي وتتمنئ حجات من ربنا
بس للاسف في طبور كبير امنيات وطلابات
وانا مش عارف دوري
لما كنت فالتحرير سالت نفسي هو دعاء الناس كله ده ضدد مبارك
بيروح فين
وكان الرد جوايه اننا محبوسين جوه صندوق ولما ندعي الدعاء بيخبط في حد
تاني عن طريق الغلط
بس هو مين اللي بينقل الحكايه دي ؟
ومين اللي بيشغل المواضيع
وليه بتحصل كارثه وناس تموت من غير اي سبب
وليه الغني مش بيشوف الفقير
وليه اصلا في فقير
وليه ديما في خطوط حمره
وليه في مثل بيقول ماحدش بينام من غير عشاء
اه صحيح هو ده مثل ولا نكته
مش عارف
" شويه ناس مخترفه اتلمو علي بعض كونو كون جديد مافهوش حدود"
" هو انا بكلم مين في حد هناااااااااااااا"
يالي هنااااااااااااا حد يرد عليا
:( للاسف مافيش
انا هنام دلوقتي بعد ما قولت اي كلام وهحاول احلم بشكل جديد للحياه
اه معلومه مهمه اوي انا مش كتاب مفتوح انا كتاب لسه فالمطبعه بيتصحح

من اول السطر

يابنت فيكي الجمال وشوشه
ماتفتاحيش زارر قميصك
انا شايفك كويس
انتي عريانه بفعل المعجزه
وتشبهي تفاصيل حكايتي
مابحبكيش وبحبك
ماتهربيش من سؤالي
هو ممكن
هو انتي ده
شخبطه كتيره في شكل دواير هبله جدا
من اول السطر
تخاريف مؤالف ابيض واسود
حبيبه بتجري علي نجيله منديه
وحببها الشاطر هواء
كان برسم شخبطه بلليل
وودان وعيون وشفايف
لا لا لا
من اول السطر
هو انت عارف حد
هو انت مني بجد
طب ليه بتظهري في صوره اه
موافق جدا انا
وانت مركز ع الحروف
اوعاك تكون فاكر
ان البدايه دي
ماعرفش
يو مافيش مشكله نكتب تاني
من اول اول اول السطر
قتلت حد امبارح
وقتلني حد انهارده
وهايقتلك بكرا السكوت
ماتخفش م الموت
ده الموت بدايه
اه صحيح صورتني امبارح مع الكبايه
اصلها نطت من فوق الكرسي وماتت
اتفشفشت مليون مثلث ومكعبات ودواير
الانتحار كان مفاجئ
والسبب مش عارف
بس ماتت
حزين انت زيي
ولا بيوصلك رزاز مني
فا تجري
من اخر السطر
مافيش حد يسمعني
اصلي وحيد

اختفاء شخص في ظروف واضحه

اختفاء شخص مهم علي غفله!!
قعدت ادور عليه كتير جدا بس مالقتهوش انا كنت لسه قاعد معاه من شويه
بس فجاه اختفئ احتمال يعني انه رجع تاني لنفس الحته الديقه
ايه بقي ناقص يا غريب الاطوار انت .
كان في : نسمه - ريهام - شيماء - هبه - شيماء 2 - مريم - هدير - سها - نورا
ايه كل ده الله يخرب بيتك
هو التريب مش مظبوط لان الاحداث كلها غريبه
اهم حد فيهم كان (ريهام ) البنت ام قلب ابيض انا كنت بحسها اختراع
موجوده علشان الناس تفرح .. كانت شبه القمر في وسط الصحراء
والباقي اقدر اقول عليهم كانو اشباح
والغريب اني ماقولتش سوره من القران علشان يختفو بس اختفو
بصراحه علشان ماكنش كداب انا ليا يد في الحدوته
اكتر حد وجعني ( نسمه -هبه - شيماء _ شيماء 2 )
كانو اشرار شويه ..
والباقي كانو طيبين
مش مهم ده كلو الحوديت خلصت والاسامي مانزلتش علي تترات الفيلم
لاننا مش ابطال
بس الغريب فالحكايه ان العامل المشترك فالحدوته
اني كنت محتاج حاجه فيهم كلهم يمكن الحنيه او الاهتمام
انا مش عارفه كلمه حب يعني ايه بس اللي اعرفه ان اي شعور طيب اسمو حب
الوقت بيجري بسرعه لما بكون مبسوط ومش عارف الحل
بس انا اتعلمت احتفظ بحاجه من الحدوته
نااااااااااااصح زي ابوك يا شيكو
.................................................
جفاره مات
وانا بشرب سيجاره
ونظاره سوده معموله عاج
وتصويره من اللي كانت حببتي
تطلعني علي قد الصوره بالملي
تطلعني جفاره مات

يا ولا حاجه

كتير اوي بكون مش عارف انا هاكتب ايه..
بس بلاقيني بكتب اني مش عارف اكتب
.............................................
بعد مارجعت من الاسكندريه اكتشفت اني ممكن ابقي فرحان باقل حاجه
واني ممكن ازعل من نفس السبب بردو
وكوني غريب الاطوار بتلخبط بسرعه وبتشوش كمان
وعرفت اني اتعلمت علشان اتشوش ..ماهو كل حاجه بتشوش
تعرف يا ولاحاجه انا امبارح كنت هاموت
شوفت يوم 25 تاني
مليان دخان قنابل بصراحه عقلي ماقدرش يستوعب الاعاده
الحكايه كلها تقريبا ان الناس تايهه والحكومه كمان تايهه
وانا مش هاضحك انهارده
يا ولا حاجه انا عاوز اقولك ان الملل مش كاس براندي سيئ الصنع
وان كاس جوينت الحشيش مش بينسي حاجه
وانك حمار يا ولا حاجه
يا ولا حاجه انا عاوز اقولك ان الحكايه بتاعتك وبتاعتها مش كامله
والموضوع مش صح تقريبا لان في حدود
انت شخبطه وهي ورق مسطر
ابعد بسرعه جدا انت مش للحب انت للكلام عن الحب بس
يا ولا حاجه اصحابي مش شبه صوابعي انا بقيت مابفهمهش
وبحس بملل كبير
يا عمود النور نور تاني وريني شخص جديد
بصراحه محتاج (نبي)
شيماء بتقولي كل يوم انها بتحبني وانا مش شايفها
يمكن علشان كدابه يمكن علشان مابتقش محتاجه
يمكن علشان في بنت شغلاني عني
او يمكن علشان ال ولا حاجه
" ماتفتكرش اني حزين يا صديقي اللي مابقاش بيقراء تدويناتي "
انا بس متاخد شويه بقولك يا اخي كنت هاموت امبارح
المشكله مش ف كوني هاموت
المشكله هنا : الكوخ هايوحشني
فااااااااااااااااااااكس
انا لسه عايش
انا كان عندي مرض واكتشفتو خلاص
لحد هنا كفايه .

من كام يوم

من كام يوم ظهرت حلات جديد .
اول حدوته هي: اني كنت بتمشئ انا وشادي وفي وسط البلد الساعه 3 الصبح كنا بنتمشي من من غير مانحط خطه .
وتعبنا شويه من المشي وقعدنا على قهوه شربنا اتنين 7up ساقع واستمتعنا بصوت الناس فالقهوه اللي مليان دوشه غير منطقيه بس المثل بيقول ( هو انت قاعد في قهوه )
وفجاه كده ظهر طارق عازف العود اللي سيد درويش امتلك كل تافصيله واحتل حياته احتلال تاااااااام
وقعدنا ندردش شويه عن عمنا سيد درويش والموضوع اتطور لفكره " ماتجي نغني "
حلوه اوي بس هانقعد فين .
وكان الاقتراح من عند شادي قال " تعالو نغني للنيل " نقعد معاه وحشني
وفعلا خدنا القرار
بس كان في مشكله ان في شويه ناس مزعجين جدااا احتلو كل الاماكن اللي ممكن تساعد الوحي انه ييجي . وببتسامه عريضه جدا قولتلهم تعالي نقعد عند الاوبرا " طبعا مش جوه لا بره علي النجيله "
وفعلا قعدنا وابتدت الموسيقي تيجي من السماء .
الغريبه هنا ان في ولد من اطفال الشوارع جه قعد معانه واول حاجه قالها " ممكن سيجاره"
قولتله عندك كام سنه قالي 14 قولتله لا مافيش سجيار في بس موسيقي ينفع
مادش عليا وقعد جنبنا ونام علي النجيله .
فاللحظه دي حسيت باني عاوز اساله ليه انت كده
فعلا جاتلي حاله الفضول وقولتله هو انت ساكن فين ؟
قالي هنا .
قولتله هنا يعني ايه ؟
قالي فالمكان ده.
قولتله يبقي كده احنا ضيوف عندك .
ابتسم وقالي اه
شويه كده واتشغلت بموسيقي طارق واغاني سيد درويش
وكمان شويه هو صحي تاني وقالي انت عاوز تاكل ؟
قولتله ليه بتسال ؟
قالي علشان اجبلك اكل !!
قولتله شكرا انا كلت
قالي انا اشتريت الكوتشي ده ب 50 جنيه ايه رائيك
قولتله جميل اوي
قالي والتي شرت ده والبنطلون ده بخمسين تاني
قولتله انت جبت الفلوس منين ؟
قالي انا بشتغل انا بسمح العربيات في الشارع.
قولتله هو انت ايه حكايتك ؟
قالي ابويا اتجوز ومراته طردتني من الشقه ولما رجعت تاني هو طردني .
وفجاه ابتداء طارق وصديقه وشادي في المناقشه هو ممكن يكون كداب
بس الغريب في الوقت ده انا كنت باصص في عينه .. هو كان صادق
انا صدقتو .
وبعد شويه قولنا احنا هانمشي بقي الشمس هاتديقنا ومشينا كل واحد في اتجاه
واللي فضل في المكان الولد اللي مليان اساله من غير عنوان .. الولد اللي مايهمهوش رائ الناس .. الولد اللي سالني هو انت جعان .
......................
ودي كانت الحاجه الاولي الغريبه اول الحاله الغريبه.
وتاني حاجه هي :
احتياجي الشديد لحب مظبوط علي مقاس قلبي وضحكتي بالظبط
وفكره التدوير علي حبيبه علي حقيقه علي تعريف للمشاعر الجميله اللي خايف تختفي مني من غير رغي الحكايه كلها الوحده ابتدت تلعب الدور بتاعها فالسنه انا اصلي كل سنه كده يجيلي نفس الدور احساس بالوحده شديد مع اني وسط اصحابي واللي هما
مش اصحاب بس لا هما اسلوب حياه بيغير ويبني ويساعد علي السير في طريق الحياه
.................
ماعرفش انا فيا ايه بالظبط
بس حاسس اوي بيا
لما احط ايدي علي صدري
بحس براحه بحس بالنفس خارج بشويش
وشخلله ناتجه عن اخر علبه سجيار
انا جواه الديره المغلقه
شكرا للاهتمام وعدم اضافه اي تعليقات على التدوينات بتاعتي

تدوينه

ايوه تدوينه جديده ياترئ هايقول ايه :
هاقول اه علي الوقت الهواء
هاقول لا انا مش ناوي الرجوع
هاقول ليه حبيت الغناء
هاقول ازي سمعت الهمس من قلبي
اه . لا. ليه. ازي
كل اللي راح مش جاي
:D ابتسامه عريضه جدا لاظهار السنان
...........................................................
لما مايعجبنيش كلام واحد فالاساسا مابيتكلمش بحسني مجنون
ولما بقعد اقول اللي جوايه لاي حد بحسني عبيط
والحقيقه الغريبه ان فعلا مجنون بس الفرق اني عارف
ومجنون في عيون ناس لاكن في عنيا انا ( عاقل ) او يوم الاربع الساعه 5
الواد كعيكع يقولي ان الموسيقي مش احساس .. بيقول ان في حاجه اسمها صوت الععازف علي الاله
وانا قولتله لا يا صديقي الحكايه كلها انه بيحس اوي اللي بيعمله علشان كده بيطلع صوت الموسيقي حلوه
وهنا يظهر شكل من اشكال الحوار الغير عادل
اولا : انا وهو بنتكلم في نفس الموضوع يعني في كل الحلات احنا بنسمع مزيكا
هايله جدا وهي اللي فتحت باب الموضوع
بس للاسف باظ بسبب التفصيص الغبي اللي من غير علم او دراسه
ثانيا : انا سمعت كويس هو بيقول ايه بس هو ماسمعنيش ... اختراعت حاجه في الحظه دي وهي اني قولتله ثواني انا سمعتك انت سمعتني
قالي اه
قولتله فهمتني .. سكت وفضل يعيد الجمله
ولما قالي ايه اكتر حد انت بتبحه في المزيكا قولتله مافيش حاجه اسمها كده
قالي لازم يكون في حد قولتله زياد الرحباني قالي ده احس واحد قولتله
لا ده اللي بحبه وبالنسبالي احس مؤلف موسيقي عربي
وفجاه كده قولت انا لازم اقفل النور واشغل مزيكا .
..............................................................................
انا محور الديره وعنيا مش عنيك
ماترميش حاجه في صدري
انا مش فاضي
وانت كمان مش فاضي ف اكيد في حاجات اهم مني بكتير
ارمي فيها ( اللي عندك )
لكن يا ايها الناس : هذا الشخص الذي ينتمي اللي الشاطئ الاخر
لا يستطيع التواصل مع الاخر بسبب عطل وضرر ناتج عن الوحده الشديده
..........................................
وتقولي مسغرب ... والله شكلك انت اللي مستغرب مش انا