بيعجبني

بيعجبني اوي شكل الناس في وسط البلد بحس انهم عاملين زي لوحه من الالوان والاحجام وحتي صوتهم انا بحب مصر علشان هي بتحبني وبحب حببتي علشان انا بحبها
وكل الحجات اللي بتتقلي مصر ايه ويعني ايه مصر وليه بتحبها انا مش هاقول الرد علشان انا تعبت اوي علشان اعرف لازم تتعبو علشان تعرفو تتكلمو عن البلد بطريقه تناسبها مصر الشعب ومصر المكان اللي على الخريطه انا اتحولت من واحد مخنوق من مصر لواحد بيحبها
ملحوظه : حببتي علمتني استخدم كلمه حب في مكنها الصحيح يارب كل الناس تتعلم ده كويس
.............................................................................
انهارده كان يوم جميل انا كنت بغني في حفله ناقد فني كبير اسمو زكي مصطفي لا استاذ زكي مصطفي
وغنيت كويس مع اني كنت تعبان بس حببتي هي اللي خلتني اغني كويس لانها استخدمه معايه اسلوب جديد مش حسي ولا مادي لا معنوي شكرا يارب انك بعتلي الهديه الجميله دي شكرا اوي

كان سحر اللي حصل

انهارده كان يوم مهم في عمري لاني كنت مع اجمل حاجه حصلتلي في حياتي وكنا بنتمشئ ودخلنا اماكن كنت ديما بشوفها مقفوله وكان نفسي ادخلها بس مدخلتهاش خالص ولما دخلت كنت مش مصدق نفسي لدرجه اني كنت بجري زي المجنون (قال يعني انا عاقل ) وكانت سيباني اسمتع بالاحساس العبقري ده حتي ماكنتش بتقولي ياله نخرج كانت بتسبني اتملي من المكان وكنت حاسس انها وثقه فيا اوي عنيها هي السحر هي الطريق المفتوح الانهائي وقرارنا نقعد علشان نرتاح ومسكت اديها لاول مره كانت ساقعه اوي اوي اتجننت اوي وفجاه كده لاقيت حد جوه دماغي بيقولي امسك اديها اوي دفيها هي محتاجه ده دلوقتي اكتر من اي وقت كانت سقعانه فيه وبعدين قررنا اننا نمشي ولقيت واحد بيبيع ذره وقولت انها سخنه لما هاتمسكها هاتدفيها علشان ممكن تكون متديقه اني ماسك اديها
وجبت ذره قعدنا نتكلم عني وعنها كتيرررررررررررررر "معلومه" انا بحس ديما اني عاوز اتكلم كتير اوي وكل ماتكلم بلاقي كلام كاني لاول مره بتكلم وفي نفس الوقت بكون عاوز اسكت علشان اسمعها ظاهره غريبه وقويه اوي واكبر من كل الاحداث اللي عشتها في حياتي
وبعد شويه دخلنا علشان نحضر حفله اللي هي اصلا كانت اساس الخروجه انا مش هاقول غير اني كنت فالجنه كنت بسمع المزيكا وكانها خارجه من جوه قلبي كانت الحفله حفله مزيكا معزوفه على اله الهارب وكان مش هارب واحد لا كانو 4 وكان بيحصل شيئ من التداخل بين صوت الموسيقي الساحر وصوت نفسها اللي كان باين كانه بيكمل الموسيقي علشان يتكلم عنها ويقولي اعرفني اكتر ادخل جوايه انا مش هاخبي عليك حاجه
خلصت الحفله وكنت في حاله من الراحه اللي من الصعب اوي تتكرر في العمر
" ده لو كنت لوحدي "
وانا قرارت اني ماكنش لوحدي تاني ووصلتها علشان تركب وتمشي وكان نفسي تقعد معايه كتير اوي اوي بنت دافيه مليانه طاقه طيبه
ولما ركبت علشان تمشي اتصلت بيها مش عارف ليه بس حسيت اني عاوز اسمع صوتها تاني وسمعتها وهي بتضحك كنت عاوز احضن الناس في الشارع كلهم وحاسس اني مافيش اي حاجه جوايه غير الشيئ الطاهر اللي اتولد على ايد بنت مابتعرفش غير الصدق والخير والجمال . انا وميدو كنا بتقول ديما اننا لازم نقول شكرا وانا بحب الحكايه دي وهاستخدم الفكره دلوقتي شكرا لكل حد ساعدني اني اشوفها السواق اللي وصلها ليا وبباها ومامتها وشكرا لكل حد بيجيب سيرتها وانا موجود وشكرا لكل كلمه خرجت منها وشكرا طبعا شكرا اوي يارب .

وصف سرررررررررررريع

وانا قاعد بكتب دلوقتي بادون الافكار بتعتي
بشغل مزيكا كتير ممكن فيروز اوjohn williams
او اي حاجه ممكن توصلني للسما بشكل مباشر
وبفضل ساكت حبه كده وبعدين ابداء احط الكي بورد على رجلي
واكتب انسي نفسي وسط حروف الكي بورد والافكار والاحساس الناتج عن المزيكا
حاله كده من الراحه
ومش بكون مركز في حاجه علشان اكتبها انا بكتب اي حاجه في اي وقت
بسيب نفسي بعد ما اطمن اني لوحدي تماما
وسعات بقول لنفسي انا علشان لوحدي بسلي نفسي واكتشف بعد كده
اني بسلي ناس معايه مش لوحدي في الاخر وده شيئ ظريف
واخلص كتابه واحط اسم للشيئ اللي انا كتبتو ده
وتحصلي حاجه من الراحه كائني كنت شايل جبل في قلبي وخرجتو
كل مره بحس اني مرتاح وكائنها اول مره اكتب فيها
طبعا في غلطات كتير في الكتابه بتعتي بس انا مش براجع كلامي وبقول هو طلع كده اكيد انا عملت مجهود علشان اكتب وانت كمان اعمل مجهود
علشان تترجم
ههههههههههههههههههههه
وشكرا

دور على الناس

??HAPPY??
كل الحجات المتشبكه بخيوط التكوين
بتتجمع وترسم الشيئ السعيد
بسمه صدق امان طيبه زكاء
حنيه ريهام
او ريمو
فامتستغربش لما تلاقي اسم انسان بقئ تصنيف
وكمان جوه حياتك اللي انت اخترت تعيش فيها وكونتها
بتكوينك
ممكن تدور على ناااااااس تشبه الشيئ الجميل اللي ف خيالك
بس ده غلط كل انسان ليها روح مختلفه عن غيرها
كل واحد جواه عالم من الاحداث اللي ملهاش نهايه
وده طبعا ف كل الناس
ومش كل الناس مهمه زي ماكنت بقول زمان لا كل الناس
فيها شيئ مهم حتي لو صغير ومش بيظهر بسهوله بس ف يوم هايظهر وهاتكتشف انهم بيكملوك
علشان كده
حاول تدور علي الناس فجيوب الناس هتلاقي
ف يوم حد بيدور عليك وهتقابلوا بعض بصدفه
علشان توصلوا لحدود الارض وتتعلموا الاندماج في كل المعاني الطيبه وديما هاتكون جواكوا الاختلاف المستخبي ف الاحتياج
ومافيش انسان كامل بس ممكن انسان يكمل انسان يبتحولوا لانسان بروحين واسمين بس المعاني والاحاسيس والقرارت وحده
دور على غيرك علشان يغيرك وتغيرو وتعرف تجمع الافكار بشكل يناسب الانسانيه
يعني انا دلوقتي اكتشفت سر من اسرار الحياه بيخليني سعيد
السر ده هو بنوته اسمها ريهام
مليانه بكل شيئ طاهر ونقي وشفاف تشبه البحر والقمر والشمس
والشجر هي جواها كتير وعلشان كده اي حد بيشوفها بيشوف اي حاجه جميله هو بيحبها
فجاه كده تلاقي النور بيظهر قدامك ومن غير كسوف
لما تكون هادي ومرتاح جدا ومبسوط جدا اسال نفسك ده بسبب ايه
وانا سالت نفسي وعرفت ده بسبب ايه بيحصل وكمان ارتحت اوي
انا عاوز اقول دلوقتي الله على الحياه لما بتجمع ناس شبه بعض
السعاده من حق الجميع ومافيش عليها اي حدود ولا بفلوس ولا عليها ضرايب اسعد غيرك هاتسعد نفسك اول درس في مدرسه ريمو
وفي كمان اكتشاف اسمو شيكولاته بيضه انا بنصح الناس انهم ياكلوها
انا عاوز احكي مشهد حصل ولد وبنت كانو قعدين في ميدان عبد المنعم رياض (في المحطه) وكانو بيسمعو اغنيه صباح ومسا لفيروز
وبيتكلموا بصوت عالي اوي وكانت الناس حواليهم زي خلفيه من الموسيقي
اتحولت الحياه لخلفيه بتساعدهم على الاستمتاع هما عرفو يخرجو بره كل الوقت
ربنا يخليكي ليا ياريمو وشكرا علشان انا اعرفك انا فخور بيكي اوي

وعوده الروح الشريد

غيرب في العالم ده وملهوش مكان
مافيش غير وحده ووحشه ووجع
بس بيفكر ديما بالمعني السحري
المستخبي في ديل الحكاوي
ويتنسي يظهر الدور بتاعو
المتشكل بلونه وطوله وملامحه
يستنئ كتيرررررررر
ويزهق ويدهن ملامح خياله بالالوان الصمته
ويكسب شويه حجات ويخسر شويه حجات
وينسي اصلا انه غريب لوقت محدد
(مش معروف)
وتهرب منه روحه وتستخبي جوه الصوف
خايف عاوزه تدفئ
مشروخه
يصنع عالم من خياله كامل متكامل
ويجري بسرعه من المعاني الديقه
ولانه بيخاف من المجهول
حتي كلمه المجهول
قرر يمسك اعصابه اللي تشبه شجره عجوزه
قديمه
فتح عينك تاكل ملبن
فينك فينك
فينك الجمله الاولي في حياته
والتانيه شويه كلام محفوظ مدروس مفهوم اومش مفهوم
كلام وخلاص
ولا هو مكتائب ولا هو سعيد
هو ديما متوسط زي الشهاده بتاعت خمسه ابتدائي
متلخبط وملخبط وكل الحجات متنعكشه في خياله
بس بيحب ديما بيحب
وديما بيقول ياله بينا
منبعج متواجد وفاني
مش باقي منه غير نغمات واضحه بتتكلم عنو
مايهمهوش القمر ولا الشمس ولا البحر ولا الجبال
اللي بيهمه ديما الاسم اللي بيقوله على الحجات
رؤيته
مجنون ودي مش سعات دي ديما
حر علشان مافيش غير الحريه اقل شيئ من حقه
ويغني و هو باصص على قلوب الناس يشبكم ببعض
ويمسح من عليهم همو وهمهم
وينام لوحده وتدخل جواه روحه المستخبيه في الصوف
علشان تدفيه وتقوله
كنت كويس انت حاسس بكده ولا مش شايف
اه صحيح قولي كده ديقت حد انهارده ايه الغلط في يومك
ديما بتقوله ايه الغلط ومش بتقولو شكرا خالص
بس انا متاكد من ان كل ده بيحصل بسبب
بسبب اي سبب بقي
حب العزيز الربع بقرش
وسعات مابيكنش في جيبه ولا قرش
مافتكرش انه زعل هو مش عبيط هو مطنش
او بيطنش الموضوع بياخده لاصل التوحد مع الزات
مافيش غير الهواء الساقع بس اللي بيعرفو انه عايش
مجنون اه انا قولت في الاول
ولا اقولك مش مجنون اي حاجه
هو معاه مفتاح القدس
ومعاه مفتاح الحلم
والوطن والصحبه
ويعرف الدعاء اللي ربنا بيسمعو لما يقوله
يارب
وعرف يغير في ناس عجبته الحكايه بقي بيدخل جوه
الناس علشان يجمع الصفات الطيبه
ويحطها على بعض ويعملها سرير وينام عليه
يحضن بايده الهواء
انتو فاكرين بيحصل ايه
تصدقو بقي ان الهواء بيحضنه
اه بيحضنه وقوي
ديما الدنيا بتتفتح ليه
وهو بينسي ديما ديما
ان الايام فرحانه بيه
هو بيشوف الدنيا
طفل صغير بيلعب بيه
وفاهم ان ده حب
وهو بيحب وعلشان بيحب حب الايام
حبتو حبو بعض بس لابد من اختفاء
لما الايام تكرهه هاتبعدو عنها
(يموت)
ويروح اي حته بقي اكيد في بطن امه كان عايش
باسلوب معين واكيد لما يموت هايخش عالم جديد
وهاينهي التفكير والاحاسيس المنعكشه
بس علشان يروح عند الاروح الطيبه لازم يكون
طيب وهو دلوقتي بيحاول
واكتشف بعد ما عاش فتره كبيره في التفكير والبحث عن الزات
انه لازم يحاول جدا اوي خالص مالص ايوه مقانص

هي دي مصر

السماء والنور
والكلمات والدماغ
والنسر الاخرس
والهجره والعش
والون الاصفر
والمكرونه
والسرير والحطان
والكلام العبيط
والدخان
وريحت شراب بقالو كتير ملبوس
وعيون واحد مستغرب
وسنان بيضه
والمشاهد السريعه
والناس وانت
والضحكه العاليه
والاتوبيس العجوز
وصوت الاذان
والخطوت البيضه فالشارع
والعساكر
والنيل الطيب
والشر
والشيخ والقص
والقهاوي
وعيون البنات اللي بتحلم بالحريه
وريحت بخور
وعشت فراخ
وام كلثوم
ومحمد منير يغني وانت قاعد بتشرب كبايه شاي على النيل جنب انور
ومنير يقول عطشان يا صبايه دلوني على السبيل
هي دي مصر من ورؤيه مصري معاصر لكل الاحداث

دخل الشتاء

وسعات اقول لنفسي انا ممكن ادهن الحيطان بالون اللي انا بحبه واتخيل اني عملت كده وابقي فرحان جدا او ممكن اخرج من الكوخ واقرر اني اجري فالشارع بسرعه وده طبعا من غير اي سبب واضح بس هي بتبقي حاله كده من الجنون الجميل .
وسعات لما حضرتك تقولي ازيك عامل ايه مش هاقولك انا عامل ايه علشان انا بتغير ومش ثابت بس الاكيد هاقولك اني لسه بفكر وبسمع مزيكا وبجري وفرحان ومصدق بكرا
وسعات اصحئ من النوم العميق علي صوت حد انا برتاح ليه اوي اوي.
وسعات اصحئ امسك الجيتار والعب مزيكا واقعد اضحك كتير واسال نفسي انا بضحك اوي كده ليه وافضل اضحك وارجع انام .
طبعا مافيش حد بيشوف المشهد ده من حياتي بس هو شكلو مجنون حبتين !!
وسعات اقول لنفسي انت يابني ليه مش بتقولها انك بحبها ونفسي تقولي لا يا مان اتقل شويه ماتبقاش مجنون ركز لاتبوظ الدنيا واركز شويه كده واكتشف اني بتكلم مع نفسي عن
الا شيئ عن ولا حاجه .
ثواني كده بص هايحصل ايه دلقوتي :
انا قلبي فيكي يا مصر بس قلبك فين
انتي البدايه المفرحه وانتي السكون انتي الجنون انتي الكتابه والخطوت
انا روحي فيكي يا مصر بس انتي روحك فين
انا قلبي متداره في حضنك بس انتي حضنك خوف
وانا روحي فيكي يامصر بس الكلام مكسوف
انتي الولد وانتي الوليد انتي البلد ام الحكاوي ام الكلام
دنا روحي فيكي وهاشتريكي ماتردنيش متهان
ماتحبسيش صوتك في قلبك اندهي استنجدي بالهرم بالنيل
بأي شيئ مفهوش صويت وعويل
بجزع نخله ممده رفضه تخاف الموت
انا روحي فيكي يا مصر بس الكلام مسجون.
(شيكو)
................................................
والمهم او الاهم يا بشر ان الناس نوعين حبه اشرار وحبه طيبين مافيش نوع تاني
( من فيلم اسمي خان )
هانحط الخوف والكذب والسكوت والكره واي حاجه ليها علاقه بالشر في الخانه الاولي (شر)
وهانحط الطيبه والصدق والحب و المساعده و اهداء الساعه للاخرين في الخانه التانيه
(خير)
يبقي كل واحد منا يدور جوه نفسه ويشوف هو مين هنا وعلى فكره انا شايف ان الخير والشر هي فلسفه كل الاديان السماويه والارضيه .
والحكاوي هاتطول اوي لو دخلنا فالحكايه بس حاول ممكن تغير حاجه بس المهم تتغير علشان تعرف تغير يعني جرب في نفسك وخلي نفسك مرايه عريانه بتظهر الاباعد المستخبيه عن اهلك واصحابك وحببتك والدنيا اسمح لنفسك تشوفها وغير فيها
...............................................................................
حكمه ومش حكمه
1 : ماتستناش من حد يقولك على اللي جواك علشان انت مش شفاف
2: اللي عندو مشاكل مع ابوه وامه لازم تعرف انك بكرت مش هاينفع ترجع تقعد على حجر مامتك او بباك يديلك 50 قرش تجيب شبسي افهم ده وحاجه تاني مش لازم تحبس نفسك بعيد عنهم لا انت حاول تضيف في البيت اي حاجه ممكن تدخل بكيلو موز مثلا .
3: لما حد يحكيلك علي حاجه اعرف ان الحد ده في ناس كتير في حياته كان ممكن يحكلهم بس هو اختارك انت اسمعو كويس ولو هاتقولو على رئيك خلي رئيك ابيض مافهوش شر زي ماقولنا
4 :انا شايف الخوف من الناس مش ده الحل لمنع المشاكل لا يا ناصح المشاكل عندك انت اه انت اللي مش بتعرف تتعامل مع الناس وشخصيتك بتبوش وسط شخصيات الناس لالالالا اسمح لنفسك انك تدخل حيات حد تاني علشان ممكن تكون انت الحل بالنسبه ليه او العكس
كفايه كده دلوقتي

مشروع الطيران

سما هي اجمل بنت كان في عيد ميلاد شيماء والوحيده اللي كانت مميزه او وكان باين عليها الزكاء شكلها وهي بترقص وبتجري وبتلعب مليان حياااااه وكان الكون الدنيا بتتجسد في عنيها
والغريب اوي انها كانت بتمشي وتسيب الحفله وتقعد تتفرج على الشجر والورد وانا استغربت علشان حاولت اكتشفها من جوه اوي فاقرارت اني اتكلم معاها وفعلا رحت قولتها اسمك ايه قالتلي سما ممكن تجبلي البلونه اللي فوق دي قولتلها ممكن طبعا ولما جبت البلونه باست خدي وقالتلي شكرا فرحت جدا انها فرحانه اه توضيح مهم هي عندها 6 سنين بس هي مصدقه انها عندها 9 وانا سالتها ليه عاوزه تبقي 9 قالتلي علشان انا كبيره انا صدقتها وقولتلها وانا مصدق ده
قولتلها اغنيلك قالتلي اه وغنتلها ولما خلصت سقفت بطريقه عسوله خالص وقالتلي انت ممكن تغني تاني قولتها اه وانا كنت بغني ولد من اصحاب شيماء خدها وقالها تعالي نفرقع البلالين دي قالتلو لا انا هاربطهم في بعض واطير بس الولد ماكنش عاوز يسمعها كويس ابتداء يفرقع البلالين وهي جريت عليه وقالتلي اضربه علشان بيفرقع البلالين بتعتي وانا رحت وقولتله بلاش تدايقها خليها تفرح قالي تراهن اني هاخليها تفرقع بنفسيها البلالين قولتله لا بلاش تعمل كده خدها وشالها وخلها تفرقع فعلا كام بلونه كده وبعدين هي مشيت وسابت الهبل ده علشان تجمع البلالين ورجعت تجمع البلالين وقولتها هاتي انتي البلالين وانا هاربطهم في بعض واشتغلنا انا وهي على المشروع الكبير ده لحد ما ربطنا 13 بلونه وكانو شكلهم جميل اوي وهي فرحت جدا وقالتلي احنا كده اصحاب قولتها اه احنا كده اصحاب
وطبعا انا كنت نسيت اصحابي اللي معايه وشيماء صحبت الحفله والكون كلو وكل الحصل اني دخلت في حيات حد جديد وحد جديد دخل في حياتي من غير اي حدود ولا مجاملات ولا كلام ملعبك كان في مشروع ونجح والولد اللي كان بيفرقع البلالين خسر وحلم الطيران هو اللي كسب ومشيت البنت الصغنونه وهي فرحانه اوي وانا كمان كنت فرحان اوي اوي جدا خالص . اسمعو الاطفال علشان هايعلجو مشاكل كتير في دمغكو من حقهم انهم يحلمو بحلم يناسب خيلهم الطاهر الجميل :)

ايوب

في وقت مالكل بيجري علشان يستخبه من البرد انا ببقي واقف هناك ايوه هناك عند النيل بستنئ الهواء يلمسني بحب احس بالبرد
بستحمل الاحساس ده لحد مايبقي جسمي كله ساقع وسعتها بعرف اني وحيد
مش بكره الوحده لا انا بس بفكر نفسي اصلي سعات بنسي الحكايه دي وده غلط مش لازم انسي حجات مهمه زي اني مثلا مزيكاتي (مغنواتي )
مش لازم انسي اني بحب فيروز مش لازم اتفاجئ بالاحداث المنطقيه زي اني ممكن حد يكدب عليه
عاوز انسي شويه حجات من اللي بتدايقني شويه زكريات لما اكتبها دلوقتي هايكون شكلها حلو بالنسبه للي بيقراء بس بالنسبالي هي مش كده زي مثلا وانا صغير كان نفسي امسك النجوم ممكن يكون في ناس شبهي في ده بس انا كنت كل يوم بقف فالشباك بليل وابص للسماء واتخيل اني هامسك النجم ده في يوم وده كان كل يوم .
وكنت اقف في الشباك يوم الجمعه الصبح قبل ما امي تصحي وابويه واختي واتفرج على الناس انا مش عارفهم واحس بحنين عجيب ليهم ومش وكنت ممكن ادمع كمان .
انا متلخبط وحاسس مش مبسوط معلش بس انا هاكمل . لما تكون جعان اوي وفلوسك كلها خلصت ومحتاج تشرب سيجاره تعمل ايه اقولك انا تعمل ايه تناااااااااااام على طول وتحلم بكل ده
حل مش سهل ومش صعب حل ساذج حبه بس بينفع ومش محتاج مجهود كبير
دلقوتي انا بعترف وانا في كامل قوايه العقليه انا مش موجود فالعالم الحقيقي ده مش موجود انا بقيت غريب عن المكان والزمان والتعريف
جوايه بس تخريف باقي من شهر الخريف اللي فات
عمال اقول للناس ديما حجات لونها ابيض لحد واسمع حجات لونها مش ابيض لحد ما اختفيت
محتاج اوي دلوقتي ابص للسماء واقف عند النيل واسيب البرد يلمسني كمان وكمان علشان اقدر فيوم اثبت اني انا انسان
ومش عصبي ولا مجنون ولا خايف ولا حتي جبان ولا بتداره من اخطائي واني ليا حق كامل اني اتنفس واشارك الناس فالهواء
واسمح للهواء جوايه بانه يخرج مني ويندمج بالجو ويدخل جوه واحد تاني مايعرفنيش ومايتاذيش من شري اوي يتملي بالخوف
انا محتار فتكويني وكون ولون شعاع الشمس
ايوب بيستحمل كتير وانا مش ايوب