بحث هذه المدونة الإلكترونية

الجمعة، 19 أبريل، 2013

تفريغ كلام مفرغ من الفراغ الفارغ

رشاد : انا  حاسس ان شيكو هايعملها 
نجفة : هايعمل ايه يا رشاد 
رشاد : هاينتحر 
محسن : انت اهبل يابني 
 السيد سعد : شيكو مبسوط 
رشاد : لا شيكو زعلان 
نجفة : انت  ازي تقول عليه زعلان او مبسوط وهو اصلا اللي بيكتب كل ده 
محسن : اه صح 
شيكو : عادي يعني انا مسامح 
مفتاح : يعني عادي ان حد يتكلم عن لسانك 
شيكو : ماهو انتو مش حد ... انتو الكتير اللي جوة 
محسن : طيب انت ازي بتسمح بوجودهم جواك ؟
شيكو : انا اللي بكتب السؤال ده 
محسن : ما انا عارف 

https://soundcloud.com/sheko-man-sheko/roflwghs8bjx




الساعة : 30 :7

اليوم : 20 \ 4

الأحد، 7 أبريل، 2013

في يوم صحيت

في يوم صحيت شاعر براحة و صفا. 
الهم زال و الحزن راح و اختفي.
 خدني العجب و سألت روحي سؤال.
 أنا مت ؟ و لا وصلت للفلسفة. 
عجبي !

" صلاح جاهين "

...........................................

بنحلم باماكن مش موجودة .. بنحاول نتكلم مع التماثيل 
بنمثل في  دراما معقدة للغايه .. بنحاول بشكل مستمر اثبات اننا اقوياء
بنحارب كلمة  " ليه " وبنسمع كلمة " معلش " 
بنلف بنلف بنلف بنلف بشكل لا نهائي في اطار محكم الغلق 
انا من زمان بحب الطيران مع  اني بخاف من الارتفاعات 
 من فترة عبقرية اكتشفت سبب المشكلة 
الطاقة ذاتها من جوة جدا واللي بيخش جوة قلبي   بيقدر يغير فيا 
انا مش غني ولكني عندي اشياء غنية جوة وكنت مش بخيل 
اديت حاجات كتير ودلوقتي مابقاش في كتير 
الدراما اتحولت لابيض واسود والمشاعر بتتصفي في حقل التجارب 
كل التجارب بتقول اني بختار غلط .. ولكني مش زعلان دلوقتي 
عرفت اصول اللعبة كويس 
 
........................................
       
امسك في ظلك وانت تمسك في ايه 
هامسك في ظلك وهانعدي من الشمس 
مش هانسيح ولا هاندوب 
هانعدي وبس 




https://soundcloud.com/sheko-mind-format/qjrfgw1er7ff




الساعة :  5:24  م

اليوم : 7\4\2013
 

الخميس، 4 أبريل، 2013

تفريغ كلام فارغ 15

قعدت فترة في حاله توهة مرعبة تماما 
كنت بمشي في الشوارع بليل زي المجنون 
وكأني بدور على حاجه 
ايه هي .. مش عارف 
بس  كنت مستمر في المشي وبس 
بسمع صوت الشارع المجنون 
وبسمع صوت الصمت 
كنت مستني شيى وتقريبا كان الشيى ده  " اغنيه "    
هاتلاقي اللينك تحت 
الموضوع بسيط جدا ابسط من ايقاع الشارع الساكت 
..................................
بفتقد سعات وشوش اصحابي 
بفتقد حضنك انتي
وصوت امي وهي بتدعي  ليا مع اني مش مؤمن ان في شيى هايحصل 
بستمر رغم احساسي بالاحباط 
برغم احساسي بالملل 
...............................
 كانت محتاجة تتحضن حضنتها 
حسيت بالدفاء وحسيت قد ايه هي كانت محتاجة تتحضن 
..............................
ببعد بشكل ملحوظ عن الواقع وده بيخليني عاوز اغني 
الغريب في الامر اني باشوفني من خارج الجسد ده
بظن ان الوقت بيحكم على الاحداث بالملل " الاحداث بالمعني الواسع "          
اتوجعت حبة حلوين الايام اللي فاتت وشوفت شوية تفاصيل 
بتثبت ان في اشباح بجد مستخبية في اجساد حولينا 
وانا بضحك .. بضحك جدا .. ولما احزن اغني 


 


https://soundcloud.com/sheko-mind-format/ti6kbt1plm7q#play


الساعة  :  4:6 ص

5\4\2013

الأحد، 10 مارس، 2013

تفريغ كلام فارغ 14

" مفتتح مفتوح  "
اتجاة الخطوط الانسانية في بحر العسل والمهلبية والوطن المصلوب ولحظات النضوج والوعي بالاشياء ... الخوف الغير مبرر من الغد والسؤال والاجابة والمعطيات 
و كتابات " اصدقاء المحوله الانسانية " عن الضعف والقوة والامل 
هنا بالظبط في اطار الوطن المغلوط 

......................................

انا بقول ان طاقة الجذب هي الاساس في الاشياء 
احنا اللي بنجذب الاشياء لينا من خلال الاحتياج 
والتركيز والاهتمام .
انا مؤمن جدا بالكلام ده وهو عندي اتحول من كونة كلام لواقع حي
بشتغل على نفسي بقالي فترة كبيرة وبحاول تفكيك الاحداث 
ولمس التفاصيل " علشان افهم "  كل اللي بوصلو في  مصر 
هو العبث واحباطات مبالغ  فيها 
انا اكتشفت نظرية جديدة بمساعدة الشاعر  "عبد الرحمن الابنودي " وهي بتقول
   
( إذا مش نازلين للناس ف بلاش
والزم بيتك.. بيتك.. بيتك
وابلع صوتك وافتكر اليوم ده
لإنه تاريخ موتى.. وموتك.
إذا مش نازلين للناس فَ بلاش
مادام الدايرة ماكاملاش
والحاجة ماتاماش
وأصحاب الحاجة ماعارفاش
إيه المعني وأى بطولة
ف إن حياتنا
واحلا سنينَّا
يروحوا بلاش؟
حاجة ماراكباش )  .. الابنودي 


القصيدة دي هي الشفرة بتاعت المرحلة وهي الخلاص 


الساعة : 10:30  ص

التاريخ : 10 \3 \ 2013  

الأربعاء، 20 فبراير، 2013

تفريغ كلام فارغ 13

مقدمة متقدمة عن النص ولا تؤثر على اي حاجه  :
عندك واحد بيرة من غير كحول او من غير شعير 
وممكن كمان تكون من غير ازازة 
واحد بيرة في التمني 


النص :
اديني عقلك وعيش من غيرة شوية :

# الكورة الارضية اللي هي اصلا بيضوية يعني من الاصول اننا نقول البيضة الارضية كا نوع من احترام الذات .

# الحروف الهندية اللي هي اصلا حروف عربية والحروف العربية 
هي الحروف الانجليزية .

# انت كا كائن بشري ماينفعش تعمل سكس في نفس الوقت اللي الحيوانات بتعمل سكس من غير اي قوانين او اعارف مكلكعة " تحريض على الجنس " 

# ممكن تقعد تتكلم كتيرررر  جدا عن مواضيع كتيرررر جدا وفي نفس الوقت في مواضيع تاني شغاله في دماغك ومش بتتكلم عنها " بتحصل " 

#  " احنا متخبلين  .. عايشين في طبق عدس كبير مع اضافة ايموشن مبتسم "
...........................................
 
علشان مايحلصش ربط بين العبث والهسس 
يبقى احنا مش لازم نعمل قوانين او اعراف 
ونخلي الغريزة الانسانية هي اللي تصنع المعجزة 
انا سعات بسال نفسي هو لو احنا شلنا كل الاديان 
والقوانين والاعراف 
هايحصل ايه 
الاجابة : همجية    
طيب ماهي الهمجية دي ذاتها موجودة في كل الحاجات اللي بقول نشلها 
الاجابة : اللي موجود ده مضمون مش لازم تنخرب في اللاشيئ
امممممممممممممممممم
ماشي 
.......................................



منطق الاشياء وفلسفة الحياة

http://www.youtube.com/watch?v=XzQhA6ZMVZA



الساعة : 9:16
اليوم : 21  2  2013  

الجمعة، 1 فبراير، 2013

هرجلة

اخيرا ياعم الاجازه
ما انا قولتلك من الاول
هو فين ميدان طلعت حرب
بيب بيب
خدي بس لما اقولك
" عربياااااااااات  كتير كتير ودوشه "
انا مش كافر بس الجوع كافر ان مش كافر بس الظلم كافر
تشرب ايه .. واحد بيبسي  مافيش ببسي كوله ماشي... .ماشي هي جت عليك
اتصال من حد
خلص الاتصال
اروح الكوخ علشان انام
مايجليش نوم اسمع فيروز
اسكت تماما في امل اوقات بيطلع من الملل
اناااااااام بعد معاناه رهيبه مع الارق
اصحي الصبح وهكذا تكون الرحله جوه كيس اللب 

 ....................................

انا خبير في الهرجله
....................................

 دم .. غاز .. بيان رئاسي .. دم .. سلمية .. بلطجية .. خرطوش .. دم 
غاز .. موت .. حوادث .. دوشة .. صمت .. ملل .. غاز .. دم .. وطن .. اصحاب 
مزيكا .. غاز .. التاكسي .. ام كلثوم .. غاز .. دم .. موت .. مات .. اتصاب .. بيان جبهة الانقاذ .. غاز .. حوادث .. موت .. دم .. باسم يوسف .. المرشد # استنى انا هانزل المحطة دي  
 
.................................

مميز وسط الناس ولا الناس مميزة وسط الحدث ولا الحديث ذاتة اللي مميز 
ولا طاقة المكان ولا العامل المشترك # 
من غير تحليل بلاش تدخل في دوامة 
اللا منطق لان الحياة اكثر منطق من رؤيتك الديقة ليها  # طبعا ده كلام في الهجايص 

..............................

أنا راح مني كمان حاجة كبيرة ..

أكبر من إني أجيب لها سيرة !

قلبي بيزغزغ روحه بروحه ..

علشان يمسح منه التكشيرة ..

ادعوله ينساها بأي ويضحك ..

الضحك ده مزيكا ..

كهربا علي ميكانيكا ..

اضحك ع الشيكا بيكا

" صلاح جاهين "
  .................................


مع كامل الاعتذار لضحاية التدوينة .. وشكرا 


الساعه : 27: 8 ص

اليوم : 2  1   2013  

الاثنين، 28 يناير، 2013

تفريغ كلام فارغ 12

مقدمة : 
تفريغ كلام فارغ وفي الاساس الكون كله بيدور وانت فاهم بقي الباقي 
...........................

عن الاحداث الحصلانة
* خطبت 
* فركشت الخطوبة 
* بشوف عبث اكبر من مستوى ادراكي للعبث ذاتة او ممكن يكون في اسم تاني الابجدية ذاتها مش عارفة تقوله بس انا ممكن اقول مثلا اللي بيحصل " استيكاريوس " 
* بنجح في الموسيقي بشكل يرضيني 
* قررت ارمي المسمار اللي كنت محتفظ بية في جيبي 
...........................
عن التفاصيل 
# مافيش كلام مقرف او كلام محترم او اي وصف اقدر  احدد بية احساسي بالخطوبة والتجربة دي  بس اللي اقدر اقوله بس " ياني ياني ياني مش هاعمل كده تاني " 

 سكرت جدا اول امبارح وكنت بغني في حفلة وفجاة حولت الاغاني كلها لاغاني صوفية وغنيت كتير للحلاج على موسيقي اليكترونية .. طبعا انا معزم بس في الحفلة دي بس بعد ازازة براني وشوت تكيلا اختلف الامر  وقمت غنيت وعملت حاله لنفسي بنفسي

فرحة الناس بيا بتسببلي حاله من الانبهار .. ببقي مش مصدق ان في حد بيحبني بالشكل ده وبعدين بكون عاوز احضنهم كلهم واحافظ على مدى التقدير والاحترام ده 

...........................     


الحاله الفضوليه بتحتم عليا اني ادعمكم في شرح اكثر عمق ومش هوامش 
بس انا بستخدم التدوينة دي علشان اوثق حياتي بشكل يناسبني انا 
وعلى العموم 
انا وخلود سبنا بعض بعد فشل مبالغ فيه في التواصل 
وسبنا بعض بشكل محترم  وهذا جزء من النص :
  
"

كل الكلام ف الدنيا والاسف مش هيفيد
باقي بس انك تريح نفسك من غير ما تفكر فيا

 زي مانا كنت بتصرف بغبا طول الوقت
احترامي كله وتقديري ليك ويارب تتوفق ف حياتك
لو الاسف هيفيد فانا اكتر واحدة اسفة ليك ف الدنيا
غني
"
  وده طبعا بيخليني اقول ان البنت دي بنت محترمة .. ولكن ماحصلش تواصل 

.......................................

 اما عني فا انا بدور في الشوارع وبغني وبكتب شعر ومستمر في 
التساؤل هو اللي بيحصل حولينا ده بجد ومين مصدر الجنون الاتضراب الكوني 
ومين السبب ولية وامتي وفين .. وبضحك وسط قاعدة اصحاب
اقول قولي هذا اودعي على مرسي مع اني عارف ان مافيش استجابة بس اهي محاوله 


" اللهم افشخ دين ام احاشائة وحطم معنوياتة واعوجلو الجانب التاني من وشة نفسي اشوفة هايبقي عامل ازي وهو معووج .. اللهم  احمي الوطن بالطريقة المناسبة للوطن وابعد عنا شر المرشد وخيرت والباقيين من الاخوان المسلمين .. امين امين امين " 

http://www.youtube.com/watch?v=eOqLnPHHa_E


الساعة 49: 1  م 
اليوم : 29  - 1-  2013